काठमाडौं । नेपाली कम्युनिस्ट पार्टी (नेकपा)का संयोजक पुष्पकमल दाहाल ‘प्रचण्ड’ले पार्टीभित्र नकारात्मकता फैलिने गतिविधिबाट टाढा रहन नेताहरूलाई आग्रह गरेका छन्।
पेरिसडाँडास्थित पार्टी कार्यालयमा डिजिटल माध्यमबाट सदस्यता नवीकरण तथा वितरण अभियान सुरु गर्दै उनले प्रतिक्रियावादी शक्तिलाई फाइदा पुग्ने गरी निराशा सिर्जना गर्ने प्रवृत्ति स्वीकार्य नहुने बताए।
संयोजक प्रचण्डका अनुसार लोकतन्त्र, गणतन्त्र, संघीयता र समावेशिताका लागि योगदान दिएका राजनीतिक दलहरूलाई कमजोर बनाउने प्रयासहरू अझै जारी रहेको छ। उनले पार्टीभित्रकै केही गतिविधिले समेत निराशा बढाउने खतरा रहेको टिप्पणी गरे।
उनले वर्तमान सरकारका नीति, बजेट र कार्यशैलीप्रति असन्तुष्टि व्यक्त गर्दै ती श्रमिक, किसान तथा आम नागरिकका हितविपरीत रहेको दाबी गरे। यस्ता नीतिहरूको विरोध विभिन्न माध्यमबाट जारी रहने उनको भनाइ थियो।
कार्यक्रममा सह–संयोजक माधवकुमार नेपालले पार्टीलाई जनकेन्द्रित बनाएर सामाजिक तथा आर्थिक रूपान्तरणको एजेन्डासहित अघि बढाइने बताए। उनले नीति स्पष्ट पार्दै संगठनलाई अझ प्रभावकारी बनाउन कार्यकर्तालाई आवश्यक प्रशिक्षण दिने योजना रहेको जानकारी दिए।
