काठमाडौं। नयाँ बानेश्वरस्थित राष्ट्रिय वाणिज्य बैंकको शाखाबाट सुन धितो राखेर कर्जा लिएका सेवाग्राहीहरूले बैंकको केन्द्रीय कार्यालयमा प्रदर्शन गरेका छन्।
जेन–जी आन्दोलनका क्रममा उक्त शाखाबाट करिब १८ किलो सुन र सवा ५ करोड रुपैयाँ नगद लुटिएको घटनापछि बैंकले अहिलेसम्म कुनै राहत वा क्षतिपूर्ति नदिएको भन्दै उनीहरूले सोमबार सिंहदरबार प्लाजास्थित केन्द्रीय कार्यालय अगाडि विरोध जनाएका हुन्।
प्रदर्शनकारीहरूले धितोका रूपमा राखिएको सुन हराएपछि बैंक व्यवस्थापनले जिम्मेवारीबाट पन्छिन खोजेको आरोप लगाएका छन्। उनीहरूले कर्जामा राखिएको सुन बराबरको क्षतिपूर्ति वा सुन फिर्ता गर्नुपर्ने माग गरेका छन्।
सुन धितोकर्ता सरस्वती बस्नेतका अनुसार पीडितहरू बैंकको ढिलासुस्ती र असंवेदनशीलताका कारण सडकमा उत्रिन बाध्य भएका हुन्। प्रदर्शनका क्रममा बैंकभित्र प्रवेश गर्ने प्रयास गर्दा प्रहरीले रोकेको थियो।
प्रदर्शनकारीहरूले सरकारी बैंकप्रति विश्वास गर्नु नै गलत भयो कि भन्ने प्रश्न उठाउँदै तत्काल समाधानको माग गरेका छन्।
