काठमाडौं । राष्ट्रिय स्वतन्त्र पार्टी (रास्वपा)को प्रथम महाधिवेशनअन्तर्गत बन्दसत्र आज सञ्चालन हुने भएको छ। बन्दसत्रका लागि आवश्यक महाधिवेशन प्रतिनिधि परिचयपत्र वितरण कार्य आज बिहान ७ बजेदेखि सुरु गरिएको छ।
प्राविधिक कारणले सोमबारका लागि तय गरिएको बन्दसत्र एक दिन पछि सारिएको थियो। पार्टीका प्रवक्ता मनिष झाका अनुसार प्रतिनिधिहरूको नामावली प्रमाणीकरण तथा परिचयपत्र छपाइको काम समयमै सम्पन्न हुन नसकेपछि बन्दसत्र मंगलबारका लागि सारिएको हो।
उनले महाधिवेशन प्रतिनिधिको विवरण प्रदेशबाट प्राप्त नामावलीसँग रुजु गर्ने तथा परिचयपत्र तयारीको प्रक्रिया पूरा गर्न थप समय आवश्यक परेकाले कार्यक्रम स्थगित गरिएको जानकारी दिए। महाधिवेशन पार्टीको सर्वोच्च निर्णय गर्ने निकाय भएकाले प्रक्रियामा कुनै विवाद वा त्रुटि नआओस् भन्ने उद्देश्यले आवश्यक सावधानी अपनाइएको उनले बताए।
पार्टीका अनुसार सोमबार साँझदेखि नै परिचयपत्र वितरण सुरु गरिएको थियो। राति छापिएका परिचयपत्रहरू प्रदेशमार्फत आज बिहानदेखि प्रतिनिधिहरूलाई वितरण गरिँदैछ। सातै प्रदेश तथा समायोजन र प्रवासतर्फका प्रतिनिधिहरूका लागि छुट्टाछुट्टै स्थानबाट कार्ड वितरणको व्यवस्था गरिएको जनाइएको छ।
परिचयपत्र वितरण सम्पन्न भएपछि पूर्वनिर्धारित कार्यतालिकाअनुसार बन्दसत्र सञ्चालन गरिनेछ। रास्वपाका महामन्त्री कविन्द्र बुर्लाकोटीका अनुसार बन्दसत्रको प्रारम्भमा अनुशासन आयोगका संयोजक रमाकान्त रिमालले आयोगको प्रतिवेदन प्रस्तुत गर्नेछन्। उक्त प्रतिवेदनमाथि प्रतिनिधिहरूबीच छलफल हुनेछ।
त्यसपछि कोषाध्यक्ष लिमा अधिकारीले आर्थिक प्रतिवेदन प्रस्तुत गर्नेछिन् र सो प्रतिवेदनमाथि पनि छलफल गरिनेछ। आर्थिक प्रतिवेदनपछि महामन्त्री बुर्लाकोटीले संगठनात्मक प्रतिवेदन प्रस्तुत गर्ने कार्यक्रम रहेको छ।
बन्दसत्रमा पार्टीको विधानमाथि सहमहामन्त्रीद्वारा छलफल गराई अनुमोदनको प्रक्रिया अघि बढाइनेछ। विधान पारित भएपछि पार्टी सभापति रवि लामिछानेले राजनीतिक प्रतिवेदन प्रस्तुत गर्नेछन्। उक्त प्रतिवेदनमाथि छलफल गरी अनुमोदन गर्ने कार्यसूची तय गरिएको छ।
त्यसपछि सभापति लामिछानेले अन्तरिम व्यवस्थापन समिति गठनको घोषणा गर्ने सम्भावित कार्यक्रम रहेको छ। आयोजक समितिले सम्पूर्ण जिम्मेवारी निर्वाचन आयोगलाई हस्तान्तरण गरेपछि आयोगले निर्वाचन प्रक्रियासम्बन्धी विस्तृत कार्यतालिका सार्वजनिक गर्नेछ।
रास्वपाको प्रथम महाधिवेशन आइतबार गेष्टहाउस चौरमा उद्घाटन गरिएको थियो। महाधिवेशनअन्तर्गतको बन्दसत्र भने उद्योग सङ्घको प्रदर्शनी केन्द्रमा सञ्चालन भइरहेको छ।
