काठमाडौं । पूर्वसञ्चार तथा सूचना प्रविधिमन्त्री मोहनबहादुर बस्नेतसहित १९ जनाविरुद्ध दायर भ्रष्टाचार मुद्दाको आजका लागि तय गरिएको सुनुवाइ स्थगित भएको छ।
अदालत प्रशासनका अनुसार बस्नेतका कानुन व्यवसायीबाट सुनुवाइ स्थगनका लागि निवेदन पेश भएपछि सुनुवाइ स्थगित गरिएको हो। टेरामक्स प्रविधि खरिदसम्बन्धी उक्त मुद्दा विशेष अदालतको न्यायाधीशद्वय नारायणप्रसाद पौडेल, हेमन्त रावल र उमेश कोइरालाको इजलासमा पेशी चढेको थियो।
अख्तियार दुरुपयोग अनुसन्धान आयोगले बस्नेतसहित १९ जनाविरुद्ध ३ अर्ब २१ करोड रुपैयाँ बिगो दाबी गर्दै मुद्दा दायर गरेको हो।
यसअघि थुनछेक बहसका क्रममा विशेष अदालतले बस्नेतलाई २५ लाख रुपैयाँ धरौटीमा रिहा गर्न आदेश दिएको थियो।
आरोपपत्रअनुसार बस्नेतले क्षेत्राधिकारभन्दा बाहिर गई एकल निर्णयमार्फत टेरामक्स खरिद प्रक्रिया अघि बढाएको तथा मन्त्रिपरिषद्को अधिकारको अपव्याख्या गर्दै निर्देशन दिएको दाबी गरिएको छ। साथै अन्तर्राष्ट्रिय कल मोनिटरिङ र भीओआईपी नियन्त्रणका लागि उपकरण तथा प्रणाली सञ्चालन सम्बन्धी प्रक्रिया अघि बढाइएको उल्लेख छ।
मुद्दामा तत्कालीन नेपाल दूरसञ्चार प्राधिकरणका अध्यक्षद्वय दिगम्बर झा र पुरुषोत्तम खनाल, सदस्यद्वय धनराज ज्ञवाली र टीकाप्रसाद उप्रेतीलाई पनि प्रतिवादी बनाइएको छ।
त्यस्तै परामर्शदाता कम्पनी भ्यानराइज सोलुसन्स, यसको नेपाली एजेन्ट कलेक्सन ट्रेड लिंक प्रालि तथा कम्पनीका अधिकारीहरू जमाल अनौटी, दिलीपकुमार गुरुङ र तेजप्रसाद खरेललाई पनि प्रतिवादी बनाइएको छ।
