काठमाडौं । राष्ट्रिय स्वतन्त्र पार्टी (रास्वपा) को प्रथम महाधिवेशनअन्तर्गत बन्दसत्रको नयाँ कार्यतालिका सार्वजनिक गरिएको छ।
चितवनमा जारी महाधिवेशनको बन्दसत्र दिउँसो २ बजेबाट सुरु हुने महामन्त्री कविन्द्र बुर्लाकोटीले जानकारी दिएका छन्।
कार्यसूचीअनुसार सुरुमा अनुशासन आयोगका तर्फबाट रमाकान्त रिमालले प्रतिवेदन प्रस्तुत गर्ने र त्यसमाथि छलफल हुनेछ। त्यसपछि दिउँसो २:३० बजे कोषाध्यक्ष लिमा अधिकारीले आर्थिक प्रतिवेदन प्रस्तुत गर्ने र छलफल गरिनेछ।
त्यस्तै ३ बजे महामन्त्री बुर्लाकोटीले संगठनात्मक प्रतिवेदन प्रस्तुत गर्ने, ३:४५ बजे सहमहामन्त्री विपिनकुमार आचार्यले विधान संशोधन प्रस्ताव प्रस्तुत गरी अनुमोदन गरिने कार्यतालिका रहेको छ।
४:४५ बजे उपसभापति स्वर्णिम वाग्लेले अर्थ–राजनीतिक प्रस्तावना प्रस्तुत गर्नेछन् भने ५:१५ बजे पार्टी सभापति रवि लामिछानेले राजनीतिक प्रतिवेदन पेश गर्नेछन्।
त्यसपछि ६:३५ बजे सभापति लामिछानेले अन्तरिम व्यवस्थापन समिति गठनको घोषणा गर्ने र आयोजक समितिले सम्पूर्ण जिम्मेवारी निर्वाचन आयोगलाई हस्तान्तरण गर्ने कार्यक्रम रहेको महामन्त्री बुर्लाकोटीले जानकारी दिए। त्यसपछि निर्वाचन आयोगमार्फत आगामी प्रक्रियागत काम अघि बढाइनेछ।
