काठमाडौं । कैलालीको गोदावरी नगरपालिका–२ मोतिपुरस्थित पूर्व–पश्चिम राजमार्गमा स्कुल अटो अनियन्त्रित भई पल्टिँदा चालकसहित १४ जना घाइते भएका छन्।
मंगलबार बिहान करिब १०:१५ बजे पश्चिमबाट पूर्वतर्फ जाँदै गरेको मालिका मन्टेश्वरी बोर्डिङ स्कुलको अटो दुर्घटनामा परेको प्रहरीले जनाएको छ। अनियन्त्रित भएपछि अटो सडकमा पल्टिएको हो।
दुर्घटनामा अटो चालक लम्कीचुहा नगरपालिका–१ का ५९ वर्षीय जगत विष्ट, शिक्षिका ३० वर्षीया तुला घर्ती तथा स्कुलका विद्यार्थीहरू गरी १४ जना घाइते भएका छन्।
घाइते सबैलाई उपचारका लागि लालरत्न अस्पताल, लम्कीमा भर्ना गरिएको छ। घटनाबारे थप अनुसन्धान भइरहेको प्रहरीले जनाएको छ।
