काठमाडौं । राष्ट्रिय स्वतन्त्र पार्टी (रास्वपा) को केन्द्रीय सदस्य पदका लागि उल्लेख्य प्रतिस्पर्धा देखिएको छ। पार्टीको ९९ सदस्यीय केन्द्रीय समितिका लागि चार सयभन्दा बढी आकांक्षीले उम्मेदवारी दर्ता गराएका छन्।
रास्वपाको केन्द्रीय निर्वाचन आयोगका प्रमुख भुवन केसीका अनुसार मनोनयन दर्ता प्रक्रिया रातिसम्म जारी रहेकाले उम्मेदवारहरूको अन्तिम सङ्ख्या यकिन गर्ने काम भइरहेको छ। प्रारम्भिक विवरणअनुसार चार सयभन्दा बढी उम्मेदवारी परेको र उम्मेदवारहरूको प्रथम चरणको नामावली आज बिहान ९ बजे सार्वजनिक गरिने तयारी गरिएको उनले जानकारी दिए।
पार्टीको महाधिवेशनमार्फत निर्वाचित हुने ९९ जना केन्द्रीय सदस्यहरूमध्येबाट पछि पदाधिकारी चयन गरिने व्यवस्था गरिएको छ। पदाधिकारीको निर्वाचन तथा चयन प्रक्रिया भने दोस्रो चरणमा सञ्चालन हुनेछ।
निर्वाचनलाई प्रविधिमैत्री बनाउन मतदानका लागि विद्युतीय प्रणाली प्रयोग गरिने भएको छ। देशभित्र रहेका प्रतिनिधिहरूले विद्युतीय उपकरणमार्फत मतदान गर्नेछन् भने विदेशमा रहेका प्रतिनिधिहरूले मोबाइल एपमार्फत आफ्नो मताधिकार प्रयोग गर्न सक्ने व्यवस्था गरिएको छ।
रास्वपाका करिब चार हजार प्रतिनिधिले मतदानमा सहभागिता जनाउने अपेक्षा गरिएको छ। ठूलो सङ्ख्यामा उम्मेदवारी परेकाले केन्द्रीय सदस्य चयनको प्रतिस्पर्धा निकै रोचक र प्रतिस्पर्धात्मक बन्ने देखिएको छ।
