काठमाडौं। नेपालमा विद्युतीय सवारीसाधनप्रतिको आकर्षण निरन्तर बढ्दै गएको देखिएको छ। चालु आर्थिक वर्षको पहिलो ११ महिनामा मात्रै २५ अर्ब ५५ करोड रुपैयाँभन्दा बढी मूल्यका १० हजार ८४५ वटा विद्युतीय सवारीसाधन आयात भएका छन्।
भन्सार विभागको तथ्याङ्कअनुसार साउनदेखि जेठ मसान्तसम्मको अवधिमा विभिन्न क्षमताका विद्युतीय सवारीसाधन नेपाल भित्रिएका हुन्। आयात भएका सवारीसाधनहरू ५० किलोवाट क्षमतादेखि २०१ किलोवाटसम्मका रहेका छन्।
उक्त अवधिमा ५० किलोवाट क्षमताका तीन हजार ६८० वटा विद्युतीय सवारीसाधन आयात भएका छन्। यी सवारीसाधनको कुल मूल्य पाँच अर्ब ६५ करोड रुपैयाँ रहेको विभागले जनाएको छ।
त्यस्तै, सबैभन्दा बढी आयात ५१ किलोवाटदेखि १०० किलोवाट क्षमताका विद्युतीय सवारीसाधनको भएको छ। यस श्रेणीका छ हजार ३५७ वटा सवारीसाधन नेपाल भित्रिएका छन्, जसको कुल मूल्य १६ अर्ब ४९ करोड ७९ लाख ४६ हजार रुपैयाँ बराबर रहेको छ।
विद्युतीय सवारीसाधनमा बढ्दो आकर्षण, पेट्रोलियम इन्धनको विकल्प खोज्ने प्रवृत्ति तथा सरकारी प्रोत्साहनात्मक नीतिका कारण पछिल्ला वर्षहरूमा नेपालमा ईभी बजार तीव्र रूपमा विस्तार हुँदै गएको छ। यसले वातावरणमैत्री यातायात प्रणालीको विकाससँगै ऊर्जा खपतको ढाँचामा समेत सकारात्मक परिवर्तन ल्याइरहेको सरोकारवालाहरूको भनाइ छ।
