काठमाडौं। काठमाडौं उपत्यकामा सवारी नियम उल्लङ्घन गर्ने २ हजार ५५० जना सवारीचालकलाई पछिल्लो २४ घण्टाभित्र ट्राफिक प्रहरीले कारबाही गरेको छ। उक्त कारबाहीबाट राज्यकोषमा १७ लाख २४ हजार ५०३ रुपैयाँ राजस्व संकलन भएको छ।
काठमाडौं उपत्यका ट्राफिक प्रहरी कार्यालयका अनुसार सबैभन्दा बढी कारबाही विभिन्न सवारी नियम उल्लङ्घन गर्ने चालकहरूमाथि गरिएको हो। मादक पदार्थ सेवन गरेर सवारी चलाउने १०२ जना, नियमविपरीत राइड सेयरिङ गर्ने १४२ जना, ट्राफिक सङ्केत बत्ती उल्लङ्घन गर्ने १४० जना तथा तीव्र गतिमा सवारी चलाउने २०७ जनालाई कारबाही गरिएको छ।
त्यस्तै, लेन अनुशासन पालना नगर्ने ५६ जना, निषेधित क्षेत्रमा हर्न बजाउने १०८ जना, तोकिएको मापदण्डभन्दा बढी धुवाँ उत्सर्जन गर्ने १४ वटा सवारीसाधन तथा प्राविधिक अवस्था परीक्षण नगरी सडकमा सञ्चालन गरिएका ३५ वटा सवारीसाधनमाथि पनि कारबाही गरिएको कार्यालयले जनाएको छ।
यस बाहेक अन्य विभिन्न प्रकारका सवारी नियम उल्लङ्घन गर्ने एक हजार ७४६ जना चालकलाई समेत कानुनी दायरामा ल्याइएको छ।
ट्राफिक प्रहरीले सडक सुरक्षा तथा दुर्घटना न्यूनीकरणका लागि नियमित अनुगमन र कारबाही अभियानलाई निरन्तरता दिइरहेको जनाएको छ। साथै सबै सवारीचालकलाई ट्राफिक नियमको पूर्ण पालना गर्न र सुरक्षित यात्रामा सहयोग पुर्याउन आग्रह गरेको छ।
