काठमाडौं। कृषकहरूको प्रमुख समस्याका रूपमा देखिएको बाँदरको आतङ्क नियन्त्रण गर्न दिक्तेल रुपाकोट मझुवागढी नगरपालिकाले आगामी आर्थिक वर्षका लागि विशेष कार्यक्रम अघि सारेको छ। कृषि बालीमा वन्यजन्तुले पुर्याउँदै आएको क्षति कम गर्ने उद्देश्यले नगरपालिकाले प्रत्येक वडा तथा टोलमा ‘बाली हेरालु’ परिचालन गर्ने योजना ल्याएको हो।
१५औँ नगरसभामा प्रस्तुत आगामी आर्थिक वर्ष २०८३/८४ को बजेटमार्फत बाँदरसहितका वन्यजन्तुबाट हुने बाली नोक्सानी न्यूनीकरणका लागि ४५ लाख रुपैयाँ छुट्याइएको छ। नगर उपप्रमुख विशन राईले प्रस्तुत गरेको बजेटमा कृषि क्षेत्रलाई उच्च प्राथमिकतामा राख्दै कुल एक अर्ब एक करोड ५५ लाख ३१ हजार १०१ रुपैयाँको बजेट प्रस्ताव गरिएको छ।
नगरप्रमुख तीर्थराज भट्टराईका अनुसार बाँदरको समस्या समाधानका लागि तत्काल राहत दिने र दीर्घकालीन समाधान खोज्ने गरी बहुआयामिक योजना तयार पारिएको छ। यसका लागि सङ्घीय सरकार तथा छिमेकी स्थानीय तहहरूसँग सहकार्य गर्ने रणनीति समेत बनाइएको छ।
कृषि उत्पादन वृद्धि र किसानको पहुँचमा सेवा पुर्याउने लक्ष्यसहित नगरपालिकाले ‘किसानलाई के चाहिन्छ ?’ अभियान सञ्चालन गर्ने भएको छ। यस कार्यक्रमअन्तर्गत कृषकको घरदैलोमै पुगेर प्राविधिक परामर्श, उन्नत बीउबिजन वितरण तथा एकीकृत घुम्ती सेवा शिविर सञ्चालन गरिनेछ।
यसैबीच, खोटाङका अन्य स्थानीय तहहरू पनि आगामी आर्थिक वर्षका नीति तथा कार्यक्रम सार्वजनिक गर्ने तयारीमा छन्। जिल्लाका केही पालिकाले यसअघि नै आफ्नो बजेट तथा कार्यक्रम प्रस्तुत गरिसकेका छन् भने बाँकी पालिकाहरूले पनि कृषि, पूर्वाधार, शिक्षा र स्थानीय विकासलाई केन्द्रमा राखेर योजना ल्याउने क्रम जारी रहेको छ।
स्थानीय किसानहरू भने लामो समयदेखि बाली जोगाउन संघर्षरत रहेकाले नगरपालिकाको नयाँ पहल प्रभावकारी कार्यान्वयन भएमा कृषि उत्पादनमा सकारात्मक परिणाम देखिन सक्ने अपेक्षा गरिएको छ।
