काठमाडौं । राष्ट्रिय स्वतन्त्र पार्टी (रास्वपा) का केन्द्रीय सदस्य चयनका लागि भएको मतदान सम्पन्न भएको छ।
पार्टीले पहिलो चरणमा केन्द्रीय सदस्यहरूको निर्वाचन प्रक्रिया अन्तर्गत मतदान सम्पन्न गरेको हो। निर्वाचन समितिका नेता गणेश पराजुलीका अनुसार करिब ६० प्रतिशत मत खसेको प्रारम्भिक अनुमान गरिएको छ।
गत असार ७ गतेदेखि सुरु भएको रास्वपाको महाधिवेशन चितवनको भरतपुरमा जारी छ। सोही महाधिवेशन अन्तर्गत सभापतिमा रवि लामिछाने निर्विरोध निर्वाचित भइसकेका छन्।
पार्टी विधानअनुसार रास्वपामा कुल १५८ केन्द्रीय सदस्य रहने व्यवस्था छ। जसमध्ये ९९ जना निर्वाचित हुनेछन् भने ५१ जना सदस्य सभापति लामिछानेले मनोनीत गर्ने प्रावधान रहेको छ।
मतदान सम्पन्न भएको करिब दुई घण्टाभित्र अन्तिम परिणाम सार्वजनिक हुने निर्वाचन समितिले जनाएको छ।
