काठमाडौं । वर्षायाम सुरु भएसँगै आजदेखि चितवन राष्ट्रिय निकुञ्जभित्र सञ्चालन हुँदै आएको जङ्गल सफारी सेवा बन्द गरिएको छ। वर्षाका कारण भलबाढी आउने, रुख ढलेर वनमार्ग अवरुद्ध हुने तथा पर्यटकको सुरक्षामा जोखिम बढ्ने भएकाले अर्को सूचना जारी नभएसम्म सफारी सेवा स्थगित गरिएको निकुञ्जले जनाएको छ।
निकुञ्जका सूचना अधिकारी अविनास थापामगरका अनुसार वर्षायाम वन्यजन्तु तथा चराचुरुङ्गीको प्रजननका लागि उपयुक्त समय भएकाले पनि सफारी बन्द गर्ने निर्णय गरिएको हो। साथै, निकुञ्जभित्रका कच्ची वनमार्ग बिग्रिने, स–साना खोलाखोल्सीमा बाढी आउने र रुख ढलेर आवतजावत अवरुद्ध हुने अवस्था रहने भएकाले यो निर्णय गरिएको उनले बताए।
चितवन राष्ट्रिय निकुञ्जले हरेक वर्ष वर्षायाममा जङ्गल सफारी बन्द गर्दै आएको छ। मौसममा सुधार आएपछि प्रायः दसैँ आसपासबाट सफारी सेवा पुनः सञ्चालन गर्ने परम्परा रहेको छ।
यद्यपि, निकुञ्जभित्रको सफारी बन्द भए पनि सामुदायिक वन क्षेत्रमा सञ्चालन हुने जीप सफारी भने नियमित रूपमा जारी रहने निकुञ्जले जनाएको छ। सौराहा, कसरा, मेघौली, माडी तथा नवलपरासीका विभिन्न क्षेत्रबाट पर्यटक बोकेका जीपहरू सामुदायिक वन क्षेत्रमा सफारी गराउँदै आएका छन्।
