काठमाडौँ । नेपाल रेडक्रस सोसाइटी (नेरेसो) ले आफ्ना कुनै पनि तहका पदाधिकारी तथा सदस्यहरू राजनीतिक दल वा तिनका भ्रातृ संगठनमा पदाधिकारीका रूपमा संलग्न भए सो संलग्नता त्याग्न आग्रह गरेको छ।
संस्थाले जारी गरेको अनुरोधमा रेडक्रसको विधान २०२० (अठारौँ संशोधन २०८२ सहित) को दफा ७२ को उपदफा ३ अनुसार सक्रिय राजनीतिमा संलग्न व्यक्तिहरू रेडक्रसका कुनै पनि समिति, आयोग वा उपसमितिमा बस्न नपाउने व्यवस्था रहेको स्पष्ट पारिएको छ।
उक्त प्रावधानअनुसार राजनीतिक दल वा तिनका संगठनमा पद धारण गरेका तथा राज्यका शासकीय संरचनामा संलग्न व्यक्तिहरूले रेडक्रसको पदाधिकारी वा सदस्यको हैसियतमा बस्न नमिल्ने उल्लेख गरिएको छ।
रेडक्रसले दोहोरो भूमिकामा रहेका व्यक्तिहरूको हकमा विधानअनुसार आवश्यक प्रक्रिया अघि बढाइने चेतावनी पनि दिएको छ। साथै, यस्तो अवस्था देखिए प्रमाणसहित सचिवालयको इमेलमार्फत जानकारी गराउन पनि सर्वसाधारणलाई अनुरोध गरिएको छ।
नेरेसो विश्व रेडक्रस तथा रेडक्रिसेन्ट अभियानको एक अंग भएको र मानवताका सात सिद्धान्त—निष्पक्षता, तटस्थता र स्वतन्त्रता—अनुसार सञ्चालन हुनुपर्ने संस्थाले जनाएको छ।
संस्थाभित्र राजनीतिक प्रभाव र संलग्नताका कारण विभिन्न चुनौती देखिएको भन्दै यसलाई नियन्त्रण गर्न वैधानिक व्यवस्था कडाइका साथ लागू गरिने जनाइएको छ।
