काठमाडौँ । निरन्तर वर्षा, बाढी तथा पहिरोका कारण देशका विभिन्न प्रदेशका प्रमुख राजमार्गहरू प्रभावित भएका छन्। नेपाल प्रहरीले बिहीबार सार्वजनिक गरेको विवरणअनुसार कोशी, बागमती, लुम्बिनी र कर्णाली प्रदेशका केही सडकखण्ड पूर्ण रूपमा बन्द रहेका छन् भने कतिपय स्थानमा एकतर्फी रूपमा मात्र यातायात सञ्चालन भइरहेको छ।
प्रहरीका अनुसार पहिरोका कारण मध्यपहाडी लोकमार्ग र मेची राजमार्गका केही खण्डमा सवारी आवागमन एकतर्फी रूपमा मात्रै सञ्चालन गरिएको छ।
त्यसैगरी, खुर्कोट–नेपालथोक–कटुञ्जेबेंसी हुँदै सञ्चालन हुने सवारी साधनहरूलाई बिपी राजमार्ग खण्डमा सञ्चालन गर्न रोक लगाइएको छ।
रोशी गाउँपालिका–११ कालढुङ्गास्थित भ्याकुरे खोलामा भने यातायात एकतर्फी रूपमा सञ्चालन भइरहेको प्रहरीले जनाएको छ।
