काठमाडौँ । नेपाल राष्ट्र बैंकले आज रु २५ अर्ब बराबरको एकवर्षे “नेपाल राष्ट्र बैंक ऋणपत्र २०८४” जारी गर्ने भएको छ। मौद्रिक व्यवस्थापन विभागका अनुसार अनलाइन बोलकबोल प्रणालीमार्फत दिउँसो ३ः०० बजेसम्म बोलकबोल प्रक्रिया सञ्चालन गरिनेछ।
राष्ट्र बैंकले जारी गरेको सूचनाअनुसार बोलकबोलबाट निर्धारण हुने ब्याजदरका आधारमा ऋणपत्र निष्कासन गरिनेछ। उक्त ऋणपत्रको अवधि एक वर्ष रहनेछ भने साँवा २०८४ असार १९ गते भुक्तानी गरिनेछ। ब्याज भने अर्धवार्षिक रूपमा भुक्तानी हुने व्यवस्था गरिएको छ।
बोलकबोल प्रक्रियामा न्यूनतम रु ५ करोड र त्यसपछि रु ५ करोडको गुणकमा कुल आह्वान रकमसम्म आवेदन दिन सकिनेछ। राष्ट्र बैंकका अनुसार यस प्रक्रियामा नेपाल राष्ट्र बैंकबाट इजाजतपत्र प्राप्त ‘क’, ‘ख’ र ‘ग’ वर्गका बैंक तथा वित्तीय संस्थाहरू मात्र सहभागी हुन पाउनेछन्।
जारी ऋणपत्रलाई नेपाल राष्ट्र बैंक तथा अन्य बैंक तथा वित्तीय संस्थामा धितोका रूपमा प्रयोग गर्न सकिनेछ। बोलकबोलबाट स्वीकृत ब्याजदरका आधारमा ऋणपत्र बाँडफाँट गरिनेछ र लगानीकर्ताको पोर्टफोलियोमा समावेश हुनेछ।
यद्यपि यसलाई अनिवार्य नगद मौज्दात (CRR) मा गणना गर्न नमिल्ने भए पनि वैधानिक तरलता अनुपात (SLR) तथा खुद तरल सम्पत्ति अनुपातमा भने गणना गर्न सकिने व्यवस्था गरिएको राष्ट्र बैंकले जनाएको छ।
