काठमाडौँ । सभामुख डोलप्रसाद (डीपी) अर्यालसँग संयुक्त अरब इमिरेट्स (युएई) का विदेश व्यापारमन्त्री डा. थानी बिन अहमद अल जेयोउदीले शिष्टाचार भेटवार्ता गरेका छन्।
सभामुखको सचिवालयका अनुसार भेटमा सभामुख अर्यालले वर्तमान संसद् गठनपछि युएईबाट भएको यो सबैभन्दा उच्चस्तरीय भ्रमण रहेको उल्लेख गर्दै यसले नेपाल–युएई सम्बन्धलाई नयाँ उचाइमा पुर्याउने तथा सहकार्यका नयाँ आयाम खोल्ने विश्वास व्यक्त गरे।
युएईका विदेश व्यापारमन्त्री जेयोउदीले नयाँ सरकार गठनपछि आफ्नो यो पहिलो नेपाल भ्रमण रहेको उल्लेख गर्दै यसले दुई देशबीचको सम्बन्धलाई अझ सुदृढ बनाउने विश्वास व्यक्त गरे।
उनले नेपालमा लगानीमैत्री वातावरण निर्माणका लागि युएई सरकार सकारात्मक रहेको बताउँदै प्रविधि, पूर्वाधार, शिक्षा लगायतका क्षेत्रमा लगानी विस्तार गर्न आफ्नो देश इच्छुक रहेको धारणा राखे।
मन्त्री जेयोउदीले युएईको विकासमा नेपाली श्रमिकहरूले पुर्याएको योगदानको प्रशंसा गर्दै नेपाल–युएई सम्बन्धलाई थप मजबुत बनाउन दुवै देशबीचको सहकार्य अझ विस्तार गरिने विश्वास व्यक्त गरे।
