काठमाडौँ । नेपाली कांग्रेसका उपसभापति विश्वप्रकाश शर्माले मुगुका गणेश नेपालीको आत्मदाहको घटनाले समाजमा बढ्दो नागरिक निराशाको प्रतिनिधित्व गरेको बताएका छन्। उनले वर्तमान सरकारको कार्यशैलीमाथि गम्भीर प्रश्नसमेत उठाएका छन्।
सामाजिक सञ्जालमार्फत धारणा सार्वजनिक गर्दै शर्माले पुराना दललाई विस्थापित गरेर ‘नयाँ’ भन्ने दाबीका साथ आएको राष्ट्रिय स्वतन्त्र पार्टी (रास्वपा) नेतृत्वको सरकारबाट पनि नागरिकमा आशा जगाउन नसकिएको भन्दै चिन्ता व्यक्त गरेका छन्।
‘हामी पुराना गएर नयाँ आएपछि पनि समाजमा होप क्रिएट (आशा जगाउने काम) किन हुन सकिरहेको छैन ? यसको गहिराइमा गहन दृष्टि जरुरी छ,’ उनले लेखेका छन्। समाजमा आशा हराउँदै गए व्यवस्था र राज्यप्रतिको विश्वाससमेत कमजोर हुने उनको भनाइ छ।
प्रधानमन्त्रीलाई सम्बोधन गर्दै शर्माले विगतका कमजोरीबाट पाठ सिक्न आग्रह गरेका छन्। ‘प्रधानमन्त्रीज्यू, गम्भीरताप्रति गम्भीर बन्नुहोस्। हिजो हाम्रा शीर्ष नेताहरूले सबै ठिकठाक भइरहेको छ भन्ठाने, जसको परिणाम नकारात्मक निक्लियो। आज फेरि त्यही गल्ती दोहोरिँदै छ,’ उनले उल्लेख गरेका छन्।
यस्तै, रास्वपा सभापति रवि लामिछानेको भूमिकामाथि पनि प्रश्न उठाउँदै शर्माले ‘के सबै ठिकठाक भइरहेको दृश्य हो यो ? सरकार आशाको होइन, त्रासको प्रतीक किन बन्दैछ ?’ भनी प्रश्न गरेका छन्।
