काठमाडौँ । इरानका दिवङ्गत सर्वोच्च नेता आयातुल्लाह अली खामेनीको अन्त्येष्टि समारोहमा ४ करोड १० लाखदेखि ४ करोड ३० लाखसम्म मानिस सहभागी भएको इरानी सञ्चारमाध्यमहरूले दाबी गरेका छन्।
इरानको प्रेस टिभीका अनुसार खामेनीको अन्त्येष्टि विश्वकै इतिहासमा सबैभन्दा ठूलो शवयात्रा भएको दाबी गरिएको छ। छ दिनसम्म सञ्चालन भएको अन्त्येष्टि तथा श्रद्धाञ्जली कार्यक्रम तेहरान, कुम, नजफ, करबला र मशहद गरी पाँच सहरमा आयोजना गरिएको थियो।
सार्वजनिक श्रद्धाञ्जली कार्यक्रम गत शनिबार तेहरानस्थित ग्रान्ड मोसल्ला धार्मिक परिसरबाट सुरु भएको थियो। उक्त कार्यक्रममा हजारौँ नागरिकले खामेनीप्रति अन्तिम श्रद्धाञ्जली अर्पण गरेका थिए।
अन्त्येष्टि समारोहमा इरानका क्षेत्रीय सहयोगी समूहका प्रतिनिधिहरू पनि सहभागी भएका थिए। इरानी सञ्चारमाध्यमका अनुसार गाजास्थित हमास र इस्लामिक जिहाद, लेबनानको हिजबुल्लाह तथा यमनका हुथी समूहका प्रतिनिधिमण्डलले पनि समारोहमा उपस्थिति जनाएका थिए।
खामेनीको अन्त्येष्टि इरानको प्रमुख शिया धार्मिकस्थल इमाम रेजा दरगाह, मशहदमा गरिएको हो। उनी चार महिनाभन्दा बढीअघि तेहरानस्थित आफ्नै निवासमा अमेरिका र इजरायलले संयुक्त रूपमा गरेको हवाई आक्रमणमा मारिएको इरानले जनाएको थियो।
