काठमाडौं। प्रधानमन्त्री बालेन्द्र शाह र राष्ट्रिय स्वतन्त्र पार्टी (रास्वपा) का सभापति रवि लामिछानेबीच आइतबार लामो भेटवार्ता भएको छ। प्रधानमन्त्री शाह आफैं लामिछानेलाई भेट्न पुगेका थिए। भेटमा पछिल्लो राजनीतिक अवस्था, सरकार सञ्चालन, पार्टीको विधान, पदाधिकारी चयन र केन्द्रीय सदस्य मनोनयनलगायत विषयमा विस्तृत छलफल भएको बताइएको छ।
रास्वपाको पहिलो महाधिवेशन सम्पन्न भएको तीन साताभन्दा बढी समय बितिसक्दा पनि पार्टीले पदाधिकारी र केन्द्रीय सदस्य मनोनयन प्रक्रिया पूरा गर्न सकेको छैन। पार्टीको नयाँ संरचना, नेतृत्व व्यवस्थापन र विधान कार्यान्वयनका विषयमा आन्तरिक छलफल जारी रहेको नेताहरूले बताएका छन्।
रास्वपाको विधानमा सभापतिलाई महत्वपूर्ण अधिकार दिइएको छ। साथै, वरिष्ठ नेता पदको व्यवस्था र पार्टी संरचनासम्बन्धी प्रावधानबारे पनि छलफल भइरहेको छ। पार्टीभित्र केही नेताहरूले शक्ति सन्तुलन र नेतृत्वको भूमिकाबारे चासो व्यक्त गर्दै आएका छन्।
यसैबीच, सरकारमाथि पछिल्ला जनसरोकारका विषयलाई लिएर आलोचना बढिरहेको छ। गणेश नेपालीको आत्मदाह घटना र सुकुम्बासी समस्यालगायत विषयमा सरकारको भूमिकामाथि प्रश्न उठिरहेको छ। ती विषयमा प्रधानमन्त्री शाह र सत्तारूढ रास्वपाले औपचारिक धारणा सार्वजनिक गरिसकेका छैनन्।
प्रधानमन्त्री शाह र सभापति लामिछानेबीच भएको भेटलाई सरकार र पार्टीबीचको समन्वय, आगामी राजनीतिक रणनीति तथा संगठन व्यवस्थापनका दृष्टिले महत्वपूर्ण रूपमा हेरिएको छ।
