काठमाडौँ । प्रमुख प्रतिपक्षी दल नेपाली कांग्रेसका सांसद निश्कल राईले जेनजी युवाहरूले आफैँ रोजेको सरकारबाटै अहिले लाठी खानुपर्ने अवस्था आएको आरोप लगाएका छन् ।
प्रतिनिधिसभाको मंगलबारको बैठकमा बोल्दै सांसद राईले सामाजिक सञ्जाल प्रतिबन्धको विरोधमा जेनजी पुस्ता सडकमा उत्रिएको, प्रहरीको गोली चल्दा ७७ जनाको ज्यान गएको र त्यही आन्दोलनले एउटा सरकार ढलेको दाबी गरे । उनले उक्त आन्दोलनपछि बालेन शाहलाई १८२ सिटको बहुमत प्राप्त भएको उल्लेख गरे ।
सांसद राईले जेनजी युवाहरूले अभिव्यक्ति स्वतन्त्रताको माग गर्दै सडकमा उत्रिएको बताउँदै अहिले त्यही पुस्ता आफैँले रोजेको सरकारको लाठी खान बाध्य भएको बताए । उनले प्रश्न गर्ने अधिकार माग्दै आन्दोलनमा उत्रिएका युवाहरूलाई अहिले प्रश्न गर्नबाट समेत वञ्चित गरिएको आरोप लगाए ।
‘यो के हो सभामुख महोदय ?’ भन्दै सांसद राईले सरकारको कार्यशैलीमाथि प्रश्न उठाए ।
उनले देशमा पुरानै प्रवृत्ति दोहोरिँदै गएको दाबी गर्दै सुरक्षा घेराभित्र लुकेर हिँड्ने अनधिकृत पात्रहरूको आतंक बढेको बताए । प्रश्न गर्ने अधिकारमाथि रोक लगाउने प्रयास भइरहेको भन्दै उनले लोकतन्त्रलाई संस्थागत हुन नदिने गतिविधि भइरहेको आरोप लगाए ।
सांसद राईले सरकार निरंकुश बन्दै गएको आरोपसमेत लगाए । सत्ता उन्मादका कारण विवेकशील अभियान, जेनजी आन्दोलन, अभिव्यक्ति स्वतन्त्रता र नागरिक अधिकारका लागि संघर्ष गरेर आएका पक्षधर सांसदहरूको आवाजसमेत दबाइएको उनको भनाइ थियो ।
