काठमाडौं । नेपालले एसीसी महिला यू–१९ प्रिमियर कपको क्वार्टरफाइनलमा जापानलाई ९ विकेटले पराजित गर्दै प्रतियोगिताको सेमिफाइनलमा स्थान बनाएको छ। यससँगै नेपाल आगामी यू–१९ महिला एसिया कपका लागि पनि छनोट भएको छ।
जितका लागि जापानले दिएको ८७ रनको लक्ष्य नेपालले ११.२ ओभरमै १ विकेट गुमाएर पूरा गर्यो।
नेपालकी ओपनर सावित्री धामीले अविजित ४१ रनको उत्कृष्ट इनिङ्स खेलिन्। कप्तान सोनी पाख्रिनले अविजित १८ रन जोड्दै टोलीलाई सहज जित दिलाइन्। अर्की ओपनर साना प्रवीणले १८ रनको योगदान दिइन्।
यसअघि टस जितेर पहिले ब्याटिङ गरेको जापान नेपाली बलरहरूसामु टिक्न सकेन। निर्धारित २० ओभरमा सबै विकेट गुमाउँदै जापान ८६ रनमै सीमित भयो। जापानका लागि कप्तान बियान्का सिनोले अविजित ३८ रन बनाए पनि अन्य ब्याटरले उल्लेखनीय प्रदर्शन गर्न सकेनन्।
नेपालका लागि क्रिस्मा गुरुङ र रिया शर्माले समान २–२ विकेट लिए। किफायती बलिङ र उत्कृष्ट फिल्डिङका कारण नेपालले जापानलाई सानो योगफलमा रोक्न सफल भयो।
समूह चरणका तीनै खेल जित्दै समूह विजेता बनेको नेपालले क्वार्टरफाइनलमा पनि प्रभावशाली प्रदर्शनलाई निरन्तरता दिएको छ। अब नेपालले सेमिफाइनलमा यूएईसँग प्रतिस्पर्धा गर्नेछ। अर्को सेमिफाइनलमा इन्डोनेसिया र थाइल्यान्ड आमनेसामने हुनेछन्।
सेमिफाइनल पुगेका नेपाल, यूएई, इन्डोनेसिया र थाइल्यान्डले आगामी यू–१९ महिला एसिया कपमा आफ्नो स्थान सुरक्षित गरेका छन्।
