काठमाडौं। उद्योग, वाणिज्य तथा आपूर्ति मन्त्रालयले बजारमा एलपी ग्यासको आपूर्ति केही दिनभित्र सहज हुने जनाएको छ। मन्त्रालयले उपभोक्तालाई अफवाहमा नलाग्न, आवश्यकताअनुसार मात्रै ग्यास खरिद गर्न र अनावश्यक सञ्चय नगर्न आग्रह गरेको छ।
मन्त्रालयका अनुसार हाल अघिल्लो वर्षको यही अवधिको तुलनामा नियमित माग धान्न सक्नेभन्दा बढी एलपी ग्यास आयात र वितरण भइरहेको छ। बढ्दो मागलाई व्यवस्थित गर्न सम्बन्धित निकायसँग समन्वय गर्दै आपूर्ति र वितरण प्रणालीलाई थप प्रभावकारी बनाउने काम जारी रहेको जनाइएको छ।
वाणिज्य, आपूर्ति तथा उपभोक्ता संरक्षण विभागले बजार अनुगमन तीव्र बनाएको छ भने नेपाल आयल निगम र ग्यास उद्योगीसँग मिलेर आयात, भण्डारण तथा वितरण प्रणालीलाई थप पारदर्शी बनाउने प्रक्रिया अघि बढाइएको मन्त्रालयले जनाएको छ। वैकल्पिक सिलिन्डर नभएका उपभोक्तालाई प्राथमिकताका आधारमा ग्यास उपलब्ध गराउन पनि आग्रह गरिएको छ।
मन्त्रालयले कृत्रिम अभाव सिर्जना गर्ने, कालोबजारी गर्ने वा उपभोक्तालाई दुःख दिने व्यक्ति तथा संस्थामाथि प्रचलित कानुनअनुसार कडा कारबाही गरिने चेतावनी समेत दिएको छ।
