काठमाडौं। प्रतिनिधिसभाअन्तर्गत आज चारवटा संसदीय समितिको बैठक बस्दै छन्। बैठकमा नेपाल राष्ट्र बैंक ऐन संशोधन, वैदेशिक रोजगार, न्यायपालिका र कृषि क्षेत्रसँग सम्बन्धित विषयमा छलफल हुने कार्यसूची तय गरिएको छ।
बिहान १० बजे बस्ने अर्थ समिति बैठकमा नेपाल राष्ट्र बैंक ऐन, २०५८ संशोधनसम्बन्धी विधेयकमाथि दफावार छलफललाई निरन्तरता दिइनेछ।
सोही समयमा बस्ने उद्योग तथा वाणिज्य र श्रम तथा उपभोक्ता हित समितिले वैदेशिक रोजगार व्यवस्थापनसम्बन्धी विषयमा छलफल गर्नेछ।
बिहान ९:३० बजे सुरु हुने कानुन, न्याय तथा मानव अधिकार समिति बैठकमा स्वतन्त्र न्यायपालिका, न्याय प्रशासनको वर्तमान अवस्था, देखिएका समस्या र समाधानका उपायबारे छलफल हुनेछ।
यस्तै, दिउँसो १ बजे बस्ने कृषि तथा प्राकृतिक स्रोत समितिको बैठकमा समितिमा प्राप्त उजुरीका विषयमा आन्तरिक छलफल हुने कार्यसूची रहेको संसद् सचिवालयले जनाएको छ।
