काठमाडौं। रौतहटको गुजरा नगरपालिका–३ स्थित धनसार पुल नजिक महेन्द्र राजमार्गमा पेट्रोल बोकेको ट्याङ्कर दुर्घटना हुँदा आगलागी भएको छ। आगलागीबाट ट्याङ्कर पूर्ण रूपमा जलेर नष्ट भएको प्रहरीले जनाएको छ।
प्रहरीका अनुसार आज बिहान करिब ५ः३० बजे बाराको अमलेखगञ्जबाट सर्लाहीतर्फ जाँदै गरेको मधेश प्रदेश ०३–००१ ख ७८११ नम्बरको पेट्रोल बोकेको ट्याङ्कर दुर्घटनामा परेको हो। सडकमा आएको मृगलाई जोगाउने क्रममा ट्याङ्कर अनियन्त्रित भई सडकको दायाँ किनारमा पल्टिएपछि अचानक आगलागी भएको थियो।
दुर्घटनामा ट्याङ्करमा पूर्ण क्षति पुगे पनि कुनै मानवीय क्षति नभएको प्रहरीले जनाएको छ। करिब १३ हजार लिटर पेट्रोल बोकेको ट्याङ्करमा लागेको आगो दमकलको सहयोगमा बिहान ७ बजे पूर्ण रूपमा नियन्त्रणमा लिइएको थियो।
घटनापछि ट्याङ्कर चालक बाराको सिमरा उपमहानगरपालिका–११ निवासी २५ वर्षीय समिर गुरुङलाई प्रहरीले नियन्त्रणमा लिएको जनाएको छ।
