काठमाडौं । पाकिस्तानको ब्रड पिकमा भएको हिमपहिरोमा परी निधन भएका विश्व कीर्तिमानी नेपाली पर्वतारोही निर्मल पुर्जा ‘निम्स दाइ’को अन्तिम संस्कार बेलायतको लन्डनमा गरिने भएको छ।
ब्रड पिक आरोहणका क्रममा गत साउन १४ गते हिमपहिरोमा परी निधन भएका पुर्जा १० सदस्यीय आरोही टोलीको नेतृत्व गरिरहेका थिए। उनको परिवार लन्डनमा रहेकाले धार्मिक परम्पराअनुसार अन्त्येष्टि उतै गर्ने निर्णय गरिएको हो।
पुर्जाको शव साउन १७ गते पहिचान भए पनि प्रतिकूल मौसम र कठिन भौगोलिक अवस्थाका कारण बुधबार मात्रै बेसक्याम्पमा ल्याइएको थियो। उनको शवसहित अन्य आरोहीको शव पनि चुनौतीपूर्ण उद्धार अभियानपछि सुरक्षित रूपमा निकालिएको एलिट एक्सपिडिसनले जनाएको छ।
पुर्जाका परिवारका अनुसार लन्डनमा अन्त्येष्टिपछि उनको जन्मस्थान म्याग्दीको अन्नपूर्ण गाउँपालिका–३, दाना र बाल्यकाल बिताएको चितवनमा समेत सम्झनाका कार्यक्रम आयोजना गरिनेछ।
पुर्जाको शव शुक्रबार राति वा शनिबारसम्म लन्डन पुर्याउने तयारी रहेको जनाइएको छ। अन्तिम विदाइका लागि आवश्यक कानुनी प्रक्रिया पूरा गर्न केही समय लाग्ने बताइएको छ।
नेपाल दूतावास, पाकिस्तान सरकार, पाकिस्तान आर्मी, गिल्गिट–बाल्टिस्तान सरकार, ब्रिटिस हाइ कमिसन र अल्पाइन क्लब अफ पाकिस्तानलगायत निकायले शव उद्धारमा सहयोग गरेका थिए।
पुर्जाले अतिरिक्त अक्सिजन प्रयोग नगरी विश्वका ८ हजार मिटरभन्दा अग्ला १४ वटै हिमाल सबैभन्दा छोटो समयमा आरोहण गरी विश्व कीर्तिमान बनाएका थिए। उनको नाममा १८ वटा गिनिज वर्ल्ड रेकर्ड रहेका छन्।
