काठमाडौं, साउन २९ । काठमाडौं–मुग्लिङ सडकखण्डअन्तर्गत धादिङको थाक्रे गाउँपालिका–६ स्थित आठकिलोमा पहिरो खसेपछि सडक दुईतर्फी अवरुद्ध भएको छ। पहिरोका कारण काठमाडौं भित्रिने तथा बाहिरिने सवारीसाधन बीच सडकमै रोकिएका छन्। सडक अवरुद्ध भएपछि यात्रु तथा सवारीचालकहरूलाई आवतजावतमा समस्या भएको छ।
धादिङ प्रहरीले दिएको जानकारीअनुसार बिहीबार बिहान करिब २:१५ बजे आठकिलोस्थित सडकमा पहिरो खसेको हो। पहिरोका कारण सडकको दुवैतर्फको यातायात प्रभावित बनेको प्रहरीले जनाएको छ।
सडकमा खसेको पहिरो हटाएर यातायात सञ्चालनमा ल्याउन अहिले चार वटा जेसिबी प्रयोग भइरहेको प्रहरीले जनाएको छ। पहिरो पन्छाउने काम जारी रहेकाले सडक पूर्णरूपमा सञ्चालनमा आउन केही समय लाग्न सक्ने देखिएको छ।
सडक अवरुद्ध भएपछि काठमाडौं प्रवेश गर्ने र काठमाडौं बाहिरिने सवारीसाधनहरू रोकिएका छन्। प्रहरीले सडकको अवस्था हेरेर यात्रा गर्न तथा सम्भावित जोखिमप्रति सतर्क रहन आग्रह गरेको छ।
