काठमाडौं। खानी तथा भूगर्भ विभागले खनिज पदार्थको उत्खनन, उत्पादन तथा निकासीसहित विभिन्न शीर्षकबाट सङ्कलन गर्ने राजस्व गत आर्थिक वर्षमा करिब ७० करोड रुपैयाँले घटेको जनाएको छ।
विभागका अनुसार आर्थिक वर्ष २०८१/८२ मा १ अर्ब ५९ करोड रुपैयाँ राजस्व सङ्कलन भएकामा आर्थिक वर्ष २०८२/८३ मा ८९ करोड ४८ लाख रुपैयाँ मात्र सङ्कलन भएको छ। अघिल्लो आर्थिक वर्षको तुलनामा गत वर्ष विभागको राजस्व सङ्कलन करिब ४४ प्रतिशतले घटेको हो।
विभागका प्रवक्ता एवं उपमहानिर्देशक गणेशनाथ त्रिपाठीका अनुसार खानी खोज तथा उत्खनन अनुमतिपत्र वितरण, इजाजत नवीकरण, भूबहाल, नक्सा तथा प्रतिवेदन शुल्कलगायतबाट विभागले राजस्व सङ्कलन गर्दै आएको छ।
देशमा औद्योगिक उत्पादन र आर्थिक गतिविधि विस्तार गर्ने उद्देश्यले चुनढुङ्गा, रातोमाटो, धातु तथा पत्थरलगायत खनिज पदार्थको उत्खननका लागि विभागले अनुमति प्रदान गर्दै आएको त्रिपाठीले बताए।
खनिज सम्पदाको अन्वेषण तथा खनिजजन्य उद्योगको विकासका लागि विभागले टुर्मालिन, टल्क, क्वार्ज, काइनाइट, मार्बल, फलाम, जिङ्क, क्वार्जजाइट, म्याग्नेसाइट, डोलोमाइट र तामालगायत खानीको अन्वेषण तथा उत्खननका लागि अनुमति दिँदै आएको छ।
विभागले खानी अनुमति तथा व्यवस्थापन, खनिज प्रशोधन, अनुगमन, विवाद समाधान, पेट्रोलियमसम्बन्धी आर्थिक अध्ययन तथा प्रवर्द्धन, धातु तथा अधातु खनिज अन्वेषण, खानी ड्रिलिङ, इन्जिनियरिङ भौगर्भिक अध्ययन र भूकम्प मापनलगायतका कार्यसमेत गर्दै आएको छ।
