काठमाडौं। धादिङको गजुरी गाउँपालिका–२, चालिसेमा सुख्खा पहिरो खस्दा पृथ्वीराजमार्ग दुवैतर्फबाट अवरुद्ध भएको छ।
सोमबार बिहान करिब ५ः४५ बजे सडक माथिबाट खसेको पहिरोले राजमार्ग ढाकिएपछि दुवैतर्फको सवारी आवागमन रोकिएको प्रहरीले जनाएको छ।
सडक खुलाउन इलाका प्रहरी कार्यालय गजुरीबाट प्रहरी सहायक निरीक्षक रामशरण बस्नेतको नेतृत्वमा ट्राफिक प्रहरीसहित ६ जनाको टोली घटनास्थलमा परिचालन गरिएको छ। टोलीले पहिरो हटाएर यातायात सञ्चालनमा ल्याउने काम गरिरहेको छ।
राजमार्ग अवरुद्ध भएपछि पृथ्वीराजमार्ग हुँदै यात्रा गर्ने सवारीसाधन र यात्रु प्रभावित भएका छन्। सडक खुलाउने काम जारी रहेकाले प्रहरीले यात्रु तथा चालकलाई आवश्यक सावधानी अपनाउन आग्रह गरेको छ।
