काठमाडौं। सङ्घीय संसद्का दुई समितिले आज छुट्टाछुट्टै बैठकमार्फत महत्वपूर्ण विषयमा छलफल गर्दैछन्। प्रतिनिधि सभा अन्तर्गतको अर्थ समिति र संयुक्त समिति संसदीय सुनुवाइ समितिको बैठक आज बिहान साढे ९ बजे बस्ने तय भएको छ।
अर्थ समितिको बैठकमा नेपाल राष्ट्र बैङ्क ऐन, २०५८ संशोधन गर्न बनेको विधेयकमाथि दफावार छलफललाई निरन्तरता दिइनेछ। छलफलमा अर्थमन्त्री, अर्थ मन्त्रालयका सचिव, कानुन सचिव तथा नेपाल राष्ट्र बैङ्कका प्रतिनिधिलाई समेत आमन्त्रण गरिएको समितिले जनाएको छ।
त्यस्तै, संसदीय सुनुवाइ समितिको बैठकमा समितिले माग गरेको सूचना तथा अभिमुखीकरण कार्यक्रमसम्बन्धी विषयमा छलफल हुने कार्यसूची छ। दुवै बैठक बिहान साढे ९ बजेदेखि सुरु हुने संसद् सचिवालयले जनाएको छ।
