काठमाडौं । संयुक्त राष्ट्रसङ्घको नयाँ महासचिव चयनका लागि सुरक्षा परिषद्ले शुक्रबार दोस्रो अनौपचारिक मतदान (स्ट्र पोल) गरेको छ। महासचिव एन्टोनियो गुटेरेसको दोस्रो कार्यकाल डिसेम्बर ३१ मा सकिँदैछ।
पहिलो स्ट्र पोलमा कोस्टा रिकाकी रेबेका ग्रिन्स्पान अग्रस्थानमा रहेकी थिइन्। दोस्रो मतदानबाट उम्मेदवारहरूको समर्थनको अवस्था र प्रतिस्पर्धा कुन दिशामा अघि बढिरहेको छ भन्ने आकलन गरिनेछ।
प्रतिस्पर्धामा अर्जेन्टिनाका राफेल ग्रोसी, चिलीकी पूर्वराष्ट्रपति मिशेल ब्याचेलेट, इक्वेडरकी मारिया फर्नान्डा एस्पिनोसा, गुयानाकी क्यारोलिन रोड्रिग्स–बर्केट, युगान्डाका ओलारा ओटुन्नु र सेनेगलका म्याकी साल छन्। इक्वेडरकी इभोन ए–बकीले पनि पछिल्लो समय उम्मेदवारी घोषणा गरेकी छन्।
सुरक्षा परिषद्का १५ सदस्यबीच हुने मतदानमा कम्तीमा नौ मत आवश्यक पर्छ। पाँच स्थायी सदस्यमध्ये कुनै एकको भिटो भएमा उम्मेदवार अघि बढ्न सक्दैनन्।
सुरक्षा परिषद्को सिफारिसपछि महासचिवको अन्तिम चयन संयुक्त राष्ट्रसङ्घको महासभाले गर्नेछ। क्षेत्रीय सन्तुलनको परम्पराअनुसार यसपटक ल्याटिन अमेरिकाबाट महासचिव चयन हुने अपेक्षा गरिएको छ।
