काठमाडौं । तनहुँको व्यास नगरपालिका–१२ छिर्कनेस्थित पृथ्वीराजमार्गमा पहिरो खस्दा यातायात सेवा प्रभावित भएको छ । आइतबार साँझ पहिरो खसेर सडकको एक लेन अवरुद्ध भएपछि अर्को लेनबाट दोहोरो सवारी आवतजावत गर्नुपर्दा यातायात असहज बनेको प्रहरीले जनाएको छ ।
पहिरो खसेको सूचना प्राप्त हुनासाथ जिल्ला प्रहरी कार्यालय तनहुँबाट प्रहरी नायब उपरीक्षक द्वारिकाप्रसाद घिमिरेको नेतृत्वमा ट्राफिक प्रहरीसहित १५ जनाको टोली घटनास्थलमा पुगेको थियो । प्रहरी टोलीले पहिरो हटाएर सडकलाई पूर्ण रूपमा सञ्चालनमा ल्याउन आवश्यक पहल गरिरहेको जनाएको छ ।
पहिरोका कारण पृथ्वीराजमार्गमा सवारीसाधनको आवतजावत प्रभावित भएकाले यात्रु तथा चालकलाई सडकको अवस्थाप्रति सतर्क रहन र सावधानीपूर्वक यात्रा गर्न प्रहरीले आग्रह गरेको छ ।
