काठमाडौं । नेपालसँग जोडिएको चीनको केरुङ (जिरोङ) नाकातर्फ जाने सडक बुधबार बिहान १० बजेदेखि पुनः सञ्चालनमा आएको छ।
चीनको तिब्बत क्षेत्रमा आएको विनाशकारी बाढीका कारण अवरुद्ध सडकको अन्तिम खण्ड अस्थायी रूपमा सञ्चालनमा ल्याइएको चिनियाँ सञ्चारमाध्यमले जनाएका छन्।
सडक खुलेसँगै उद्धारकर्मी, राहत सामग्री, आवश्यक उपकरण तथा भारी मेसिनरीलाई विपद्को मुख्य प्रभावित क्षेत्रमा स्थलमार्गबाटै पुर्याउन सहज भएको छ। यसअघि सडक अवरुद्ध हुँदा उद्धार तथा राहत सामग्री ढुवानीमा कठिनाइ हुँदै आएको थियो।
चिनियाँ सरकारी सञ्चारमाध्यम सीसीटीभीका अनुसार G216 राष्ट्रिय राजमार्गको क्षतिग्रस्त अन्तिम खण्डमा अस्थायी रूपमा यातायात सञ्चालन गरिएको हो। सडक खुलेपछि भारी मेसिनरीसमेत मुख्य विपद् प्रभावित क्षेत्रतर्फ लैजान थालिएको छ।
चीनतर्फको केरुङ नाका भवन रहेको क्षेत्रनजिकैसम्म राष्ट्रिय राजमार्ग सफा गर्ने भारी मेसिनरी पुगेको जनाइएको छ। उद्धार टोलीले विभिन्न उपकरणको समन्वयमा मुख्य प्रभावित क्षेत्रमा खोज तथा उद्धार कार्य जारी राखेका छन्।
सडक सञ्चालनमा आएसँगै प्रभावित क्षेत्रमा थप उद्धार सामग्री तथा उपकरण पुर्याउन सहज हुने र खोज तथा उद्धार कार्य थप तीव्र हुने चिनियाँ सञ्चारमाध्यमले जनाएका छन्।
