काठमाडौं । रसुवा-भोटेकोशी क्षेत्रमा बाढीका कारण विस्थापित भएका परिवारलाई सुरक्षित स्थानमा पुनःस्थापना गर्न सरकारले प्रक्रिया अघि बढाएको छ। सरकारले अस्थायी बसोबास र दीर्घकालीन पुनःस्थापनाका लागि उपयुक्त जग्गा पहिचान गर्न नापी विभागका महानिर्देशक प्रकाश जोशीको संयोजकत्वमा समिति गठन** गरेको हो।
समितिले बाढीबाट घरजग्गा गुमाएका, पुरानै स्थानमा बस्न जोखिम रहेका तथा जोखिमकै बीच प्रभावित क्षेत्रमा बसिरहेका परिवारको वास्तविक विवरण संकलन गर्नेछ।
त्यसपछि स्थानीय तह, भूमि प्रशासन र नापी कार्यालयको समन्वयमा पुनःस्थापनाका लागि सम्भावित जग्गा पहिचान गरी स्थलगत अध्ययन गरिनेछ। पहिचान भएका स्थानमा बाढी–पहिरोको जोखिम, भौगोलिक अवस्था, बसोबासको उपयुक्तता र आवश्यक पूर्वाधारबारे प्रारम्भिक मूल्याङ्कनसमेत गरिने मन्त्रालयले जनाएको छ।
समितिले आवश्यक कानुनी प्रक्रिया र पुनःस्थापनाका लागि उपयुक्त विकल्पसहितको प्रतिवेदन मन्त्रालयमा बुझाउनेछ। सरकारको यो कदमले विपद्पछि अस्थायी आश्रयमा रहेका परिवारलाई सुरक्षित र व्यवस्थित रूपमा पुनःस्थापना गर्ने तयारी अघि बढेको संकेत गरेको छ।
