काठमाडौं । आज देशभर ‘जेन्जी’ सहिद दिवस मनाइँदै छ। गत भदौ २३ गते भएको ‘जेन्जी’ आन्दोलनले नेपालको राजनीतिक घटनाक्रममा ठूलो परिवर्तन ल्याएको थियो। आन्दोलन चर्किएपछि तत्कालीन सरकार विघटन भएको थियो भने त्यसपछि पूर्वप्रधानन्यायाधीश सुशीला कार्कीको नेतृत्वमा चुनावी सरकार गठन गरिएको थियो।
आन्दोलनका क्रममा ज्यान गुमाएका युवाको योगदान, साहस र बलिदानको स्मरण तथा सम्मानमा सरकारले आज सार्वजनिक बिदा दिएको छ। आन्दोलनमा जीवन गुमाएका युवाप्रति श्रद्धाञ्जली अर्पण गर्दै विभिन्न कार्यक्रम आयोजना गरिने भएका छन्।
सरकारले यही भदौ १८ गते बसेको मन्त्रिपरिषद्को बैठकमार्फत आज देशभर सार्वजनिक बिदा दिने निर्णय गरेको थियो। सरकारले ‘जेन्जी’ आन्दोलनका क्रममा ज्यान गुमाएका युवाको सम्मान र स्मृतिलाई संस्थागत गर्ने उद्देश्यले सहिद दिवसका रूपमा यो दिन मनाउने निर्णय गरेको हो।
