काठमाडौं । नेपाली कांग्रेसको केन्द्रीय निर्वाचन समितिको बैठक मंगलबार बस्ने भएको छ। पार्टी केन्द्रीय कार्यालयमा मंगलबार दिउँसो १ बजे बस्ने गरी बैठक बोलाइएको केन्द्रीय निर्वाचन समितिका सदस्यसचिव राजु कटुवालले जानकारी दिए।
उनका अनुसार बैठकमा पार्टीको आन्तरिक निर्वाचनसँग सम्बन्धित आगामी रणनीति, आवश्यक तयारी तथा निर्वाचन प्रक्रियालाई व्यवस्थित रूपमा अघि बढाउने विषयमा छलफल हुनेछ। पछिल्लो समय पार्टीका विभिन्न तहका अधिवेशन तथा निर्वाचनसम्बन्धी कार्यतालिकामा देखिएको परिवर्तनका विषयमा समेत बैठकमा छलफल हुने अपेक्षा गरिएको छ।
यसअघि नेपाली कांग्रेसको केन्द्रीय कार्यसम्पादन समितिको आइतबार बसेको बैठकले भदौ २४ गतेका लागि तय गरिएको वडा अधिवेशन असोजको पहिलो साता गर्ने निर्णय गरेको थियो। वडा अधिवेशनको नयाँ कार्यतालिका र त्यसअनुसार गर्नुपर्ने तयारीबारे पनि निर्वाचन समितिको बैठकमा छलफल हुने बताइएको छ।
