काठमाडौं । स्पेसएक्ससँग जोडिएको सेयर मूल्यमा आएको तीव्र गिरावटले विश्वका सबैभन्दा धनी व्यक्ति एलन मस्कको सम्पत्तिमा ठूलो प्रभाव पारेको छ। यसअघि कम्पनीको आईपीओ र सेयर वृद्धिले उनलाई खरबपतिबाट नयाँ उचाइमा पुर्याएको भए पनि पछिल्लो गिरावटले उनको सम्पत्तिमा उल्लेखनीय कमी आएको हो।
सोमबार मात्र स्पेसएक्सको सेयर मूल्य १६.४३ प्रतिशतले घट्दै १५४.६० डलरमा बन्द भयो। मस्कसँग करिब ४.७६ अर्ब स्पेसएक्स सेयर रहेको अनुमान गरिन्छ। यही गिरावटका कारण उनको व्यक्तिगत सम्पत्तिमा करिब १५२ अर्ब डलर बराबरको कमी आएको बताइएको छ, जुन वारेन बफेटले आफ्नो जीवनभर आर्जन गरेको अनुमानित सम्पत्तिभन्दा पनि बढी हो।
स्पेसएक्ससँगै सोमबार विश्वका अन्य प्रमुख अर्बपतिहरूको सम्पत्तिमा पनि गिरावट देखिएको छ। ल्यारी पेज, सर्गेइ ब्रिन, जेफ बेजोस, ल्यारी एलिसन, मार्क जुकरबर्ग र बर्नार्ड आर्नोल्ट लगायतका अर्बपतिहरूको सम्पत्तिमा उनीहरूको कम्पनीहरूको सेयर मूल्य घटेसँगै असर परेको हो।
हालको गिरावटपछि पनि एलन मस्कको कुल सम्पत्ति करिब १.०८ ट्रिलियन डलर रहेको अनुमान छ, जसका कारण उनी अझै पनि विश्वकै शीर्ष धनी व्यक्तिमा कायम छन्। ब्लूमबर्ग अर्बपति सूचकांक अनुसार, दोस्रो स्थानमा रहेका ल्यारी पेजको सम्पत्ति मस्कको तुलनामा निकै कम छ।
यद्यपि विश्लेषकहरूका अनुसार स्पेसएक्सको सेयर मूल्यमा थप गिरावट जारी रहेमा मस्कको सम्पत्ति ट्रिलियन डलर स्तरबाट तल झर्न सक्ने सम्भावना पनि नकार्न सकिँदैन।
मस्कको हालको सम्पत्ति केही देशहरूको कुल अर्थतन्त्रभन्दा पनि ठूलो रहेको विभिन्न वित्तीय विश्लेषणहरूले देखाएका छन्। उनकाे सम्पत्ति ताइवान, आयरल्याण्ड, बेल्जियम, स्वीडेन, इजरायल र अर्जेन्टिना जस्ता मुलुकहरूको जीडीपीभन्दा बढी रहेको बताइन्छ।
भारतको करिब ४.१५ ट्रिलियन डलर जीडीपीसँग तुलना गर्दा मस्कको सम्पत्ति त्यसको झण्डै एक–चौथाइ बराबर पर्छ।
विश्वमा १ ट्रिलियन डलरभन्दा बढी जीडीपी भएका देशहरूको संख्या सीमित मात्र छ, जसले मस्कको व्यक्तिगत सम्पत्तिको आकारलाई अझै उल्लेखनीय बनाउँछ।
पाकिस्तानको करिब ४०० अर्ब डलर अर्थतन्त्रसँग तुलना गर्दा मस्कको सम्पत्ति त्यसको झण्डै दुई गुणाभन्दा बढी रहेको अनुमान गरिन्छ।
Read More
