काठमाडौं । उच्च अदालत पाटनले बैंकिङ कसुर मुद्दामा व्यवसायी शंकरलाल अग्रवाललाई पुर्पक्षका लागि थुनामा पठाउने आदेश दिएको छ।
न्यायाधीशद्वय अर्जुनप्रसाद कोइराला र कविप्रसाद न्यौपानेको संयुक्त वाणिज्य इजलासले बिहीबार अग्रवाललाई थुनामा राखेर मुद्दाको प्रक्रिया अघि बढाउन आदेश दिएको हो। आदेशपछि अग्रवाललाई ललितपुरस्थित नक्खु कारागार पठाइएको छ। अग्रवाल शंकर ग्रुपका अध्यक्ष हुन्।
अदालतले जगदम्बा स्टिल्स लिमिटेडले लिएको बैंक कर्जा दुरुपयोग भएको देखिएको भन्दै यस्तो आदेश दिएको हो। आदेशमा जगदम्बा स्टिल्सबाट जारी भएका चेकमा अग्रवालको हस्ताक्षर रहेको, उनको खातामार्फत सहअभियुक्त दीपक भट्टको खातामा रकम गएको तथा विभिन्न समयमा चेकमार्फत रकम प्राप्त गरेको विषय उल्लेख गरिएको छ।
अदालतका अनुसार एनएमबी बैंकको अगुवाइमा विभिन्न बैंकबाट सहवित्तीयकरणमार्फत जगदम्बा स्टिल्सले लिएको चालु पुँजी तथा अल्पकालीन कर्जा योजनाबद्ध रूपमा दुरुपयोग गरी भट्टको स्वामित्व रहेको इन्फिनिटी होल्डिङ्समा सेयर लगानी गरिएको देखिएको छ।
अदालतले अग्रवाल र सुलभ अग्रवाल कम्पनी सञ्चालन तथा खाता व्यवस्थापनमा संलग्न व्यक्ति रहेको उल्लेख गर्दै कर्जा दुरुपयोगबारे जानकारी नभएको दाबी स्वीकार गर्न नसकिने जनाएको छ।
