काठमाडौं । नेपाल राष्ट्र बैंकले आर्थिक वर्ष २०८२/८३ को मौद्रिक नीतिको वार्षिक समीक्षा प्रतिवेदन सार्वजनिक गरेको छ । केन्द्रीय बैंकले मंगलबार मौद्रिक नीति कार्यान्वयनको अवस्था र उपलब्धिको मूल्याङ्कनसहित प्रतिवेदन सार्वजनिक गरेको हो ।
मौद्रिक नीतिसम्बन्धी व्यवस्था अनुसार राष्ट्र बैंकले प्रत्येक वर्ष अघिल्लो आर्थिक वर्षमा अवलम्बन तथा कार्यान्वयन गरिएका नीतिको समीक्षा गरी प्रतिवेदन सार्वजनिक गर्नुपर्ने हुन्छ । सोही व्यवस्थाअनुसार चालु आर्थिक वर्षको मौद्रिक नीतिको कार्यान्वयन अवस्थाबारे समीक्षा गरिएको राष्ट्र बैंकले जनाएको छ ।
प्रतिवेदनमा आर्थिक वर्ष २०८२/८३ मा मुद्रास्फीतिलाई ५ प्रतिशतको सीमाभित्र कायम राख्ने लक्ष्य लिइएको उल्लेख छ । चालु आर्थिक वर्षको पहिलो १० महिनासम्मको औसत उपभोक्ता मुद्रास्फीति २.६६ प्रतिशत रहेको राष्ट्र बैंकले जनाएको छ ।
