काठमाडौँ । सरकारले सूचीकरण नगरेका सामाजिक सञ्जालमाथि कडाइ गर्ने तयारी अन्तिम चरणमा पुर्याएको छ।
एक हप्ता अघि सूचना तथा सञ्चार प्रविधि मन्त्रालयले सबै सामाजिक सञ्जाललाई सूचीकरणको लागि दिएको म्याद बुधबार राति सकिएको हो।
अब त्यस अनुसार, आज साँझदेखि नै सूचीकरण नभएका सामाजिक सञ्जाल क्रमशः बन्द गरिने सरकारको योजना छ। मन्त्रालयका अनुसार, आज दिनभरीमा यस विषयमा मन्त्रीस्तरीय तहबाट निर्णय लिइनेछ, र कार्यान्वयन सुरु हुनेछ ।
कसरी बन्द गरिन्छ ?
सरकारले यसअघि नै मन्त्री परिषदबाट सूचीकरण अनिवार्य गर्ने निर्णय गरिसकेको छ। अब कार्यान्वयन चरणमा सूचना तथा प्रविधि मन्त्रालय अगाडि बढ्नेछ। बन्द गर्ने प्रक्रिया प्राविधिक र कानुनी आधारमा अघि बढाइने जनाइएको छ।
सूचीकरणमा आएका र नआएका सञ्जालहरू
अहिलेसम्म नेपालमा टिकटक, भाइबर, निम्बुज, विटक र ओपोलाइट जस्ता सञ्जालहरू सूचीकरणमा परेका छन्। टेलिग्राम र ग्लोबल लिंक सूचीकरण प्रक्रियामा छन्।
तर, फेसबुक, युट्युब, एक्स (पूर्व ट्विटर) जस्ता सर्वाधिक प्रयोग हुने सामाजिक सञ्जालहरूले अझैसम्म सूचीकरण प्रक्रिया पुरा गरेका छैनन्, जसले गर्दा यिनै प्लेटफर्महरू बन्दको मुख्य निशानामा छन् ।
पछिल्लो सन्देश के हो?
सूचना प्रविधि मन्त्रालयले सबै सामाजिक सञ्जाललाई नेपाली कानुन अनुरूप सञ्चालन गर्न आग्रह गर्दै आएको छ। अब यसको पालना नगर्नेहरूलाई बन्द गरेर मात्रै अघि बढ्ने सरकारको संकेत प्रष्ट देखिएको छ।
