काठमाडौं । विपद् प्रभावित क्षेत्रमा निरीक्षण तथा अनुगमनका नाममा मन्त्री र सरकारी कर्मचारीले हेलिकप्टर प्रयोग गर्ने अभ्यास अन्त्य गर्ने घोषणा गरिएको छ। गृहमन्त्री सुधन गुरुङले यस्तो अभ्यासलाई राज्य स्रोतको दुरुपयोग भन्दै अबदेखि उद्धार र सुरक्षामा संलग्न निकायबाहेक कसैलाई पनि विपद्का बेला हेलिकप्टर प्रयोग गर्न नपाइने स्पष्ट निर्देशन दिएका छन्।
राष्ट्रिय विपद् जोखिम न्यूनीकरण तथा व्यवस्थापन प्राधिकरणमा सुरक्षा निकायका प्रमुखहरूसँग भएको उच्चस्तरीय बैठकमा गृहमन्त्री गुरुङले विगतको कार्यशैलीप्रति असन्तुष्टि व्यक्त गर्दै विपद् व्यवस्थापनमा पूर्वतयारी र समन्वयलाई प्राथमिकता दिनुपर्नेमा जोड दिए। उनले आपत्कालीन अवस्थामा मात्र प्रतिक्रिया दिने परम्परा परिवर्तन गर्न आवश्यक रहेको बताए।
उनले अघिल्ला वर्षहरूमा बाढी–पहिरोका समयमा हेलिकप्टरको अनावश्यक प्रयोग भएको उल्लेख गर्दै आफू स्वयंले पनि हेलिकप्टर प्रयोग नगर्ने प्रतिबद्धता जनाए। गृहमन्त्रीले सबै निकायलाई उच्च जोखिम क्षेत्रहरूमा पूर्वतयारी र एकीकृत रूपमा काम गर्न निर्देशन दिँदै जनधनको क्षति न्यून गर्न प्रभावकारी समन्वय आवश्यक रहेको बताए।
