काठमाडौं । नेकपा (एमाले)का उपाध्यक्ष विष्णु पौडेललाई मंगलबार बिहान ललितपुर ल्याइएको छ । उनलाई सोमबार (असार ८) साँझ सुर्खेतबाट प्रहरीले नियन्त्रणमा लिएको थियो ।
काठमाडौं ल्याएपछि पौडेललाई ललितपुरस्थित सम्पत्ति शुद्धीकरण अनुसन्धान विभागको कार्यालयमा लगिएको छ ।
थप अनुसन्धानका लागि थुनामा राख्न अनुमति माग्दै उनलाई आजै अदालतमा पेस गर्ने तयारी गरिएको छ ।
काठमाडौं । मोरङको रंगेली नगरपालिका–१ स्थित कोचनी खोलामा डुबेर बेपत्ता भएकी ७ वर्षीया बालिकाको शव फेला परेको छ।
मोरङ प्रहरीका सूचना अधिकारी डीएसपी मकेन्द्रकुमार मिश्रका अनुसार मृत भेटिएकी बालिका रंगेली–१ निवासी अनिल खवासकी छोरी एलिना खवास हुन्।
बालिका सोमबार साँझ स्थानीय सञ्जीव चौधरीकी ८ वर्षीया छोरी साबिती चौधरीसँग कोचनी खोलामा पौडी खेल्न गएकी थिइन्। सोही क्रममा एलिना खोलामा डुबेर बेपत्ता भएको प्रहरीले जनाएको छ।
खोजी अभियानपछि राति करिब ११ बजे उनको शव फेला परेको हो। घटनास्थलबाट करिब १ सय मिटर तल स्थानीयले शव देखेपछि प्रहरीलाई खबर गरेका थिए। त्यसअघि प्रहरी र स्थानीयले लामो समयसम्म खोजी गरेका थिए।
शवलाई पोस्टमार्टमका लागि रंगेली अस्पतालमा राखिएको छ भने घटनाबारे थप अनुसन्धान भइरहेको प्रहरीले जनाएको छ।
काठमाडौं । आकर्षक तलबको प्रलोभन देखाई टर्की र बेलायत पठाइदिने भन्दै रकम ठगी गरेको आरोपमा प्रहरीले दुई जनालाई पक्राउ गरेको छ।
पक्राउ पर्नेहरूमा गोकर्णेश्वर नगरपालिका–७ बस्ने बारा निजगढ नगरपालिका–१३ घर भएका ४९ वर्षीय सुरेश गिरी र ललितपुर महालक्ष्मी नगरपालिका–१ बस्ने संखुवासभा चैनपुर नगरपालिका–३ घर भएका ७० वर्षीय वीरबहादुर श्रेष्ठ रहेका छन्।
प्रहरीका अनुसार सुरेश गिरीले एक जना पीडितबाट टर्की पठाइदिने भन्दै १ लाख ९० हजार रुपैयाँ लिएको र वीरबहादुर श्रेष्ठले बेलायत पठाइदिने भन्दै एक जना पीडितबाट २ लाख रुपैयाँ लिएर सम्पर्कविहीन भएको उजुरी परेको थियो।
उक्त उजुरीका आधारमा काठमाडौं उपत्यका अपराध अनुसन्धान कार्यालय टेकुबाट खटिएको टोलीले सुरेशलाई काठमाडौं महानगरपालिका–१२ बाट र वीरबहादुरलाई ललितपुर महालक्ष्मी नगरपालिका–१ बाट पक्राउ गरेको हो।
उनीहरूलाई आवश्यक अनुसन्धान तथा कारबाहीका लागि वैदेशिक रोजगार विभाग ताहाचल, काठमाडौं पठाइएको प्रहरीले जनाएको छ।
काठमाडौं । विश्वको अत्यन्त रणनीतिक समुद्री मार्ग मानिने स्ट्रेट अफ होर्मुज हुँदै व्यापारिक जहाजहरूको आवागमन क्रमशः बढ्न थालेको छ।
समुद्री यातायात अनुगमन संस्था मरीन ट्राफिकका अनुसार पछिल्लो २४ घण्टामा कम्तीमा २४ वटा व्यापारिक जहाजले उक्त जलमार्ग पार गरेका छन्। तीमध्ये आठ तेल ट्यांकर र दुई मालवाहक जहाज फारसी खाडीबाट बाहिरिएका छन् भने आठ ट्यांकर र छ मालवाहक जहाज खाडी क्षेत्रमा प्रवेश गरेका छन्।
यो संख्या हालैका महिनाहरूमा देखिएको न्यून आवागमनको तुलनामा उल्लेखनीय वृद्धि भएको बताइएको छ। यसअघि युद्धको अवस्था सुरु भएयता दैनिक जहाज आवागमनमा गिरावट आएको थियो, जबकि युद्धपूर्व दैनिक औसत करिब ११० जहाज उक्त मार्ग प्रयोग गर्ने गर्थे।
नेभिगेसन हस्तक्षेपमा कमी
पछिल्ला महिनाहरूमा होर्मुज क्षेत्रमा जहाजहरूको GPS प्रणालीमा देखिएको कृत्रिम अवरोध (स्पुफिङ) का घटनाहरू पनि उल्लेखनीय रूपमा घटेका छन्। यसले जहाजहरूको वास्तविक स्थान निर्धारणमा देखिएको समस्या केही हदसम्म कम गरेको छ, जसले समुद्री यातायात व्यवस्थापन सहज बनाएको छ।
विश्लेषकहरूका अनुसार हालको सुधारले अन्तर्राष्ट्रिय व्यापार र ऊर्जा ढुवानीमा सकारात्मक प्रभाव पार्न थालेको छ।
स्ट्रेट अफ होर्मुजमार्फत विश्वमा खपत हुने करिब २० प्रतिशत तेल तथा प्राकृतिक ग्यास ढुवानी हुने भएकाले यो मार्गलाई अत्यन्त संवेदनशील र महत्वपूर्ण मानिन्छ।
काठमाडौं । राष्ट्रिय स्वतन्त्र पार्टी (रास्वपा) को प्रथम महाधिवेशनअन्तर्गत बन्दसत्रका लागि प्रतिनिधि परिचयपत्र वितरण कार्य सुरु गरिएको छ।
पार्टीका अनुसार परिचयपत्र वितरण छिटो सम्पन्न गर्ने उद्देश्यले विभिन्न नौ स्थानबाट एकैसाथ प्रक्रिया अघि बढाइएको हो।
रास्वपा चितवनका सभापति ई. मिनीमाधव खनालका अनुसार सातै प्रदेश, प्रवास तथा समायोजनबाट आएका प्रतिनिधिहरूलाई छुट्टाछुट्टै स्थानमा परिचयपत्र वितरण भइरहेको छ।
प्रतिनिधिहरूको अन्तिम टुंगो लागेपछि स्वचालित प्रणालीमार्फत परिचयपत्र छपाइ गरिएको कारण केही ढिलाइ भएको उनले बताए। परिचयपत्र वितरण कार्य पूरा भएपछि मात्र बन्दसत्र औपचारिक रूपमा सुरु हुने जनाइएको छ।
महाधिवेशनको बन्दसत्र भरतपुरस्थित उद्योग संघ परिसरमा रहेको प्रदर्शनी केन्द्रमा आयोजना हुने तय गरिएको छ।
काठमाडौं । ११ वर्षीया बालिकामाथि जबरजस्ती करणी गरेको आरोपमा प्रहरीले एक जनालाई पक्राउ गरेको छ।
पक्राउ पर्नेमा हाल भक्तपुरको गठ्ठाघरमा बस्दै आएका सुनसरीको धरान उपमहानगरपालिका–४ घर भएका ३८ वर्षीय भीमबहादुर राई रहेका छन्।
पीडित पक्षबाट परेको उजुरीका आधारमा प्रहरी वृत्त ठिमीबाट खटिएको टोलीले राईलाई सोमबार राति नियन्त्रणमा लिएको हो।
प्रहरीका अनुसार घटनाबारे थप अनुसन्धान भइरहेको छ।
काठमाडौँ । हेटौंडा उपमहानगरपालिकाले आगामी आर्थिक वर्ष २०८३/८४ का लागि कुल २ अर्ब ५८ करोड ५ लाख रुपैयाँको बजेट सार्वजनिक गरेको छ।
उपमहानगरको १९औं नगरसभामा उपप्रमुख राजेश बानियाँले प्रस्तुत गरेको बजेटमा आन्तरिक स्रोत, राजस्व बाँडफाँट तथा संघीय र प्रदेश सरकारबाट प्राप्त अनुदानलाई प्रमुख आधार बनाइएको छ।
बजेट संरचना अनुसार आन्तरिक स्रोतबाट ५७ करोड ३६ लाख ८० हजार रुपैयाँ, राजस्व बाँडफाँटबाट ९१ करोड २० लाख ४८ हजार रुपैयाँ, प्रदेश सरकारबाट १० करोड १ लाख ७२ हजार रुपैयाँ तथा संघीय सरकारबाट १ अर्ब १८ करोड ४६ लाख रुपैयाँ प्राप्त हुने अनुमान गरिएको छ।
क्षेत्रगत विनियोजन
उपमहानगरपालिकाले आगामी वर्षका लागि विभिन्न क्षेत्रहरूमा बजेट विनियोजन गरेको छ। पूर्वाधार विकासतर्फ ६७ करोड १९ लाख रुपैयाँ छुट्याइएको छ भने वडास्तरीय योजना तथा कार्यक्रमका लागि ४८ करोड ४० लाख रुपैयाँ विनियोजन गरिएको छ।
त्यस्तै आर्थिक विकास क्षेत्रमा १० करोड ३६ लाख रुपैयाँ, सामाजिक विकासमा ८४ करोड १५ लाख रुपैयाँ, जनस्वास्थ्य क्षेत्रमा १ करोड ४० लाख रुपैयाँ र युवा तथा खेलकुद क्षेत्रमा पनि १ करोड ४० लाख रुपैयाँ विनियोजन गरिएको छ।
नगरसभामा प्रस्तुत बजेटले आगामी वर्षका नीति तथा कार्यक्रम कार्यान्वयनका लागि आवश्यक वित्तीय आधार तयार गर्ने लक्ष्य राखिएको उपमहानगरपालिकाले जनाएको छ।
काठमाडौँ । नेपाली बजारमा आज सुन र चाँदी दुवैको मूल्यमा गिरावट आएको छ।
नेपाल सुनचाँदी व्यवसायी महासंघका अनुसार आज सुनको मूल्य तोलामा १ हजार ६ सय रुपैयाँले घट्दै २ लाख ८७ हजार १ सय रुपैयाँमा कारोबार भइरहेको छ। सोमबार सुन तोलामा २ लाख ८८ हजार ७ सय रुपैयाँमा कारोबार भएको थियो।
त्यसैगरी, चाँदीको मूल्य पनि घटेको छ। महासंघका अनुसार आज चाँदी तोलामा १४० रुपैयाँले घटेर ४ हजार ५९० रुपैयाँमा कारोबार भइरहेको छ। सोमबार चाँदी तोलामा ४ हजार ७३० रुपैयाँमा कारोबार भएको थियो।
काठमाडौं । अमेरिका–इरानबीच जारी तनाव अन्त्य गर्ने उद्देश्यले स्विट्जरल्यान्डमा सम्पन्न वार्तापछि इरानले रणनीतिक रूपमा अत्यन्त महत्वपूर्ण मानिने हर्मुज जलघाँटी आफ्नो प्रशासनिक नियन्त्रणमै रहने स्पष्ट पारेको छ।
इरानका प्रमुख वार्ताकार तथा संसद् अध्यक्ष मोहम्मद बाघेर घालीबाफले युद्धअघि जस्तो अवस्था अब दोहोरिन नदिने र अन्तर्राष्ट्रिय कानुनअनुसार हर्मुज जलमार्ग इरानकै प्रशासनमा रहने बताएका छन्। वार्तापछि तेहरान फर्किएका उनले छलफलबाट केही सकारात्मक प्रगति भएको दाबी पनि गरे।
वार्तामा देखिएको प्रगति
स्विट्जरल्यान्डको बर्गनस्टक रिसोर्टमा भएको अमेरिका–इरान वार्तामा हर्मुज जलमार्गको सुरक्षा, लेबनानको द्वन्द्व, इरानी तेलमा दिइएका छुट तथा रोक्का सम्पत्तिको विषयमा छलफल भएको जनाइएको छ। घालीबाफका अनुसार यी विषयमा केही महत्वपूर्ण प्रगति हासिल भएको छ।
दुवै पक्षबीच समुद्री मार्ग खुला राख्ने, आवागमन सुरक्षित बनाउने र क्षेत्रीय तनाव घटाउन सञ्चार संयन्त्र स्थापना गर्ने सहमति भएको बताइएको छ। मध्यस्थकर्ताहरूका अनुसार संकट व्यवस्थापनका लागि प्रत्यक्ष सम्पर्क प्रणाली विकास गर्ने समझदारी पनि बनेको छ।
आणविक निरीक्षण र प्रतिबन्धमा सम्भावित राहत
वार्तापछि अमेरिकी उपराष्ट्रपति जेडी भान्सले इरानले संयुक्त राष्ट्रसंघीय आणविक निरीक्षकहरूलाई पुनः देशभित्र प्रवेश अनुमति दिने संकेत दिएको जानकारी दिएका छन्। साथै, अमेरिकाले इरानी तेलमाथि लगाइएका केही प्रतिबन्ध अस्थायी रूपमा खुकुलो पारेको बताइएको छ।
सम्झौताअनुसार इरानले आंशिक प्रतिबन्ध राहत पाउने र विदेशमा रोकिएका सम्पत्तिहरू क्रमशः फुकुवा हुने अपेक्षा गरिएको छ।
जलमार्गको अवस्था र क्षेत्रीय तनाव
इरानले सुरुमा बन्द गरेको हर्मुज जलमार्ग पछिल्ला सहमतिपछि पुनः सञ्चालनमा आएको थियो। यद्यपि लेबनानमा इजरायली आक्रमणपछि तेहरानले पुनः जलमार्ग बन्द गर्ने चेतावनी दिएको थियो, जसले क्षेत्रीय तनाव थप बढाएको थियो।
कतार र पाकिस्तानका मध्यस्थकर्ताहरूको संलग्नतामा हाल व्यापारिक जहाजहरूको सुरक्षित आवागमन, सम्भावित दुर्घटना रोकथाम र गलत बुझाइबाट उत्पन्न हुन सक्ने तनाव कम गर्न प्रत्यक्ष सञ्चार संयन्त्र स्थापना गर्ने सहमति भएको जनाइएको छ।
समुद्री यातायात निगरानी संस्थाहरूका अनुसार वार्तापछि हर्मुज जलघाँटीमा जहाज आवागमन पुनः तीव्र भएको छ, जसले तत्कालका लागि तनाव केही कम भएको संकेत गरेको बताइन्छ।
काठमाडौं । राष्ट्रिय स्वतन्त्र पार्टी (रास्वपा) को आजदेखि सुरु हुने महाधिवेशनअन्तर्गत बन्दसत्रमा पाँच वटा प्रमुख प्रतिवेदन प्रस्तुत गरिने भएका छन्।
कार्यसूचीअनुसार पार्टी सभापति रवि लामिछानेले राजनीतिक प्रतिवेदन प्रस्तुत गर्नेछन् भने महामन्त्रीद्वय कविन्द्र बुर्लाकोटी र भुपदेव शाहले संगठनात्मक प्रतिवेदन पेश गर्ने कार्यक्रम रहेको छ।
त्यसैगरी कोषाध्यक्ष लीमा अधिकारीले लेखा प्रतिवेदन प्रस्तुत गर्नेछिन्। पार्टी निर्वाचन आयोगका प्रमुख भुवन केसीले निर्वाचन आयोगसम्बन्धी प्रतिवेदन पेश गर्नेछन् भने अनुशासन आयोगका प्रमुख रमाकान्त रिमालले अनुशासन आयोगको प्रतिवेदन प्रस्तुत गर्नेछन्।
महामन्त्री भुपदेव शाहका अनुसार हालै चितवनमा बसेको केन्द्रीय समिति बैठकले सबै प्रतिवेदन अनुमोदन गरी महाधिवेशनमा प्रस्तुत गर्ने निर्णय गरिसकेको छ।
महाधिवेशनमा करिब २,५०० प्रतिनिधिको सहभागिता रहनेछ, जसमा करिब २०० जना विदेशमा रहेका नेपालीहरूको प्रतिनिधित्व रहने बताइएको छ। कार्यक्रम सञ्चालनका लागि करिब ४ करोड रुपैयाँ खर्च हुने अनुमान गरिएको छ।