काठमाडौं । पर्सामा राजस्व छलीको आशंकामा नियन्त्रणमा लिइएको एक मालवाहक ट्रकबाट ठूलो परिमाणमा प्रतिबन्धित लागुऔषध ट्रामाडोल बरामद भएको छ।

वीरगन्जबाट काठमाडौंतर्फ जाँदै गरेको बा.प्र. ०३–००१ ख ३३४६ नम्बरको ट्रकलाई तस्करीजन्य सामान ओसारपसार भइरहेको सूचनाका आधारमा प्रहरीले नियन्त्रणमा लिएर थप अनुसन्धानका लागि राजस्व अनुसन्धान कार्यालय पथलैयामा बुझाएको थियो।

राजस्व अनुसन्धान कार्यालयले ट्रकको विस्तृत जाँच गर्दा १२ हजार पत्ता ट्रामाडोल फेला परेको सूचना अधिकारी प्रमोद प्रसादले जानकारी दिए। उनका अनुसार ट्रकमा अन्य विभिन्न सामानसँगै ठूलो परिमाणमा औषधिजन्य सामग्रीसमेत लुकाइ राखिएको अवस्थामा भेटिएको थियो।

बरामद गरिएको लागुऔषध, ट्रक तथा सम्बन्धित व्यक्तिलाई आवश्यक कानुनी कारबाहीका लागि पुनः जिल्ला प्रहरी कार्यालय पर्सामा पठाइएको जनाइएको छ।

घटनाबारे थप अनुसन्धान जारी रहेको प्रहरीले जनाएको छ।

Read More

काठमाडौं । बलिउड फिल्म ‘लभ एण्ड वार’को छायांकनस्थलमा भएको दुर्घटनामा एक प्राविधिक कर्मचारीको मृत्यु भएको छ। मुम्बईस्थित फिल्म सिटीको रोयल पाम स्टुडियोमा सर्ट सर्किटबाट करेन्ट लाग्दा ४२ वर्षीय सिकर्मी चन्द्रधारी सिंह यादवको ज्यान गएको भारतीय सञ्चारमाध्यमहरूले जनाएका छन्।

घटनाका बेला अभिनेत्री आलिया भट्ट सेटमा छायांकनमा व्यस्त रहेको बताइएको छ। दुर्घटनापछि फिल्म उद्योगसम्बद्ध श्रमिक संगठनहरूले सेटमा सुरक्षा व्यवस्थाबारे प्रश्न उठाएका छन्।

फेडरेशन अफ वेस्टर्न इन्डिया सिने एम्प्लोइजले मृतकका परिवारलाई दिइने क्षतिपूर्ति रकम बढाउन तथा उनका छोराछोरीको शिक्षाको जिम्मेवारी सुनिश्चित गर्न निर्माण पक्षसँग आग्रह गरेको छ। साथै, मृतककी श्रीमतीलाई रोजगारीको व्यवस्था गर्नसमेत माग गरिएको छ।

संगठनका अनुसार यादवले दुर्घटनाअघि लगातार लामो समय काम गरेका थिए। अत्यधिक कार्यबोझ र पर्याप्त सुरक्षा सतर्कताको अभाव दुर्घटनाको सम्भावित कारण हुन सक्ने अनुमान गरिएको छ। यस घटनापछि चलचित्र निर्माणस्थलमा सुरक्षा मापदण्ड कडाइका साथ लागू गर्न माग गरिएको छ।

सञ्जय लीला भन्साली निर्देशित ‘लभ एण्ड वार’मा रणबीर कपूर, आलिया भट्ट र विक्की कौशल मुख्य भूमिकामा छन्। बहुप्रतीक्षित यो फिल्म सन् २०२७ जनवरीमा प्रदर्शन गर्ने तयारी गरिएको छ।

Read More

काठमाडौं । सुदूरपश्चिम प्रदेश सरकारले आगामी आर्थिक वर्ष २०८३/८४ का लागि प्रस्तुत गरेको बजेटप्रति सत्ता साझेदार दल नेकपा (एमाले) ले गम्भीर असन्तुष्टि व्यक्त गरेको छ। पार्टीले बजेटमा आवश्यक संशोधन नगरिए सरकारलाई दिएको समर्थन पुनर्विचार गर्न सकिने चेतावनीसमेत दिएको छ।

नेकपा (एमाले) सुदूरपश्चिम प्रदेश कमिटीको ११औँ पूर्ण बैठकले प्रदेश सरकारले ल्याएको बजेट सन्तुलित र समावेशी नभएको निष्कर्ष निकालेको जनाएको छ। बैठकले बजेट निर्माण प्रक्रियामा सत्ता गठबन्धनको अर्को प्रमुख साझेदार दललाई पर्याप्त महत्व नदिइएको तथा एकपक्षीय ढंगले कार्यक्रम समावेश गरिएको ठहर गरेको छ।

पार्टीले वर्तमान स्वरूपमा बजेट पारित गर्न नसकिने अडान दोहोर्‍याउँदै आवश्यक संशोधन अपरिहार्य रहेको उल्लेख गरेको छ। प्रदेश उपसचिव तथा प्रचार–प्रकाशन विभाग प्रमुख भागरथी विष्टद्वारा जारी विज्ञप्तिमा प्रदेश सरकारबाट अपेक्षित सहकार्य र समन्वय हुन नसकेको जनाइएको छ।

एमालेले बजेटमा आफ्ना सुझाव र प्राथमिकतालाई समेटेर पुनः परिमार्जन गर्न आग्रह गर्दै त्यसतर्फ ध्यान नदिइए सरकारप्रतिको समर्थनबारे पुनः निर्णय लिन बाध्य हुने संकेत दिएको छ।

धनगढीस्थित प्रदेश पार्टी कार्यालयमा सम्पन्न बैठकको अध्यक्षता प्रदेश अध्यक्ष कृष्णप्रसाद जैशीले गरेका थिए। कार्यक्रममा पार्टीका केन्द्रीय सदस्य तथा सुदूरपश्चिम इन्चार्ज दामोदर भण्डारीको प्रमुख आतिथ्यता रहेको थियो।

प्रदेश सरकारको बजेटलाई लिएर सत्ता गठबन्धनभित्रै असन्तुष्टि सार्वजनिक भएसँगै आगामी दिनमा प्रदेश राजनीतिको समीकरण प्रभावित हुन सक्ने आकलन गरिएको छ।

Read More

काठमाडौं । काठमाडौं उपत्यकाका विश्व सम्पदा सूचीमा सूचीकृत प्रमुख धार्मिक तथा सांस्कृतिक सम्पदास्थलमा देखिएको जग्गा स्वामित्वसम्बन्धी विवाद समाधान गर्न महालेखापरीक्षकको कार्यालयले सम्बन्धित निकायलाई आवश्यक पहल गर्न सुझाव दिएको छ।

महालेखापरीक्षकको ६३औँ वार्षिक प्रतिवेदनअन्तर्गतको कार्यमूलक लेखापरीक्षणमा पशुपति क्षेत्र, बौद्धनाथ स्तूप क्षेत्र र स्वयम्भूनाथ क्षेत्रमा गुठी संस्थान तथा सम्बन्धित कोष वा विकास समितिबीच जग्गाको स्वामित्वलाई लिएर विवाद रहेको उल्लेख गरिएको छ। प्रतिवेदनले यस्ता विवादले सम्पदाको संरक्षण तथा व्यवस्थापनमा चुनौती सिर्जना गर्न सक्ने औंल्याएको छ।

प्रतिवेदनमा गुठी संस्थान ऐन, प्राचीन स्मारक संरक्षण ऐन तथा विभिन्न क्षेत्र विकास समितिसम्बन्धी कानुनी व्यवस्थाबीच आवश्यक समन्वय र स्पष्टता कायम गर्नुपर्ने सुझाव दिइएको छ। मूर्त तथा अमूर्त सम्पदाको स्वामित्व स्पष्ट रूपमा निर्धारण गरी संरक्षण र व्यवस्थापन प्रणालीलाई थप प्रभावकारी बनाउनुपर्नेमा जोड दिइएको छ।

गुठी संस्थानले उपत्यकाभित्र सञ्चालन हुने विभिन्न धार्मिक तथा सांस्कृतिक परम्पराको संरक्षणमा महत्वपूर्ण भूमिका निर्वाह गर्दै आएको प्रतिवेदनमा उल्लेख छ। काठमाडौं, भक्तपुर र ललितपुर जिल्लामा रहेका दुई हजारभन्दा बढी अमूर्त सम्पदासँग सम्बन्धित जात्रा, पर्व तथा पूजाआजा गुठीको आम्दानीबाट सञ्चालन हुँदै आएका छन्।

यसका अतिरिक्त स्थानीय तह, हेरचाह अड्डा, विभिन्न कोष तथा विकास समितिहरूले पनि यस्ता सम्पदाको संरक्षण र सञ्चालनमा सहयोग पुर्‍याइरहेका छन्।

प्रतिवेदनअनुसार देशभरका ६८ जिल्लामा रहेका दुई हजारभन्दा बढी राजगुठीअन्तर्गत पहाडी क्षेत्रमा पाँच लाख ६१ हजार ९९० रोपनी तथा तराई क्षेत्रमा ६६ हजार ३३० बिघा गुठी जग्गा रहेको छ। यी जग्गाबाट प्राप्त आम्दानी विभिन्न मठ, मन्दिर, जात्रा, पर्व तथा धार्मिक गतिविधि सञ्चालनमा प्रयोग हुँदै आएको उल्लेख गरिएको छ।

महालेखापरीक्षकको कार्यालयले सांस्कृतिक सम्पदाको दीर्घकालीन संरक्षणका लागि स्वामित्व विवाद समाधान गर्दै कानुनी तथा संस्थागत संरचनाबीच स्पष्ट जिम्मेवारी निर्धारण गर्नुपर्ने आवश्यकता औंल्याएको छ।

Read More

काठमाडौं । शिक्षा, विज्ञान तथा प्रविधि मन्त्रालयले कक्षा १२ को नतिजा प्रकाशन प्रक्रियामा कुनै त्रुटि वा लापरवाही नभएको स्पष्ट गरेको छ। मन्त्रालयले नतिजासम्बन्धी उठाइएका प्रश्नहरू तथ्यभन्दा बढी भ्रम र प्रचारमा आधारित रहेको जनाएको छ।

सिंहदरबारमा मंगलबार बसेको विकास, आर्थिक मामिला तथा सुशासन समितिको बैठकमा शिक्षा सचिव चूडामणि पौडेलले नतिजा प्रकाशनबारे मन्त्रालयले गरेको समीक्षा तथा अध्ययनमा कुनै समस्या नदेखिएको बताए। उनका अनुसार उत्तरपुस्तिका परीक्षणदेखि नतिजा प्रकाशनसम्मको प्रक्रिया इमान्दारीपूर्वक सम्पन्न गरिएको थियो।

सचिव पौडेलले यस वर्ष शिक्षकहरूलाई थप जिम्मेवार बनाइएको तथा मूल्याङ्कन प्रणालीलाई व्यवस्थित गरिएकाले ग्रेड प्राप्त गर्ने विद्यार्थीको प्रतिशतमा सुधार आएको बताए। उनले विगतको तुलनामा नतिजा छिटो सार्वजनिक गर्न पनि मन्त्रालय सफल भएको उल्लेख गरे।

बैठकमा विश्वविद्यालयहरूको नियुक्ति प्रक्रियाबारे उठेका जिज्ञासाको जवाफ दिँदै उनले सम्बन्धित विश्वविद्यालय ऐनअनुसार नै नियुक्ति प्रक्रिया सञ्चालन भइरहेको बताए। खुला विश्वविद्यालयका स्थायी शिक्षकसम्बन्धी विषयमा मन्त्रालयको ध्यानाकर्षण भएको र आवश्यक पहल भइरहेको जानकारी पनि उनले दिए।

उच्च शिक्षाको अन्तर्राष्ट्रिय आकर्षणबारे चर्चा गर्दै सचिव पौडेलले हाल नेपालका विभिन्न विश्वविद्यालयमा करिब १,४०० विदेशी विद्यार्थी अध्ययनरत रहेको जानकारी दिए। विदेशी विद्यार्थीलाई नेपालमा अध्ययन गर्न सहज वातावरण निर्माण गर्ने उद्देश्यले विद्यार्थी भिसा प्रक्रियालाई थप सरल बनाउने विषयमा गृह मन्त्रालयसँग छलफल भइरहेको उनले बताए।

चिकित्सा शिक्षामा विदेशी विद्यार्थीको सहभागिता बढाउन कोटा विस्तारसम्बन्धी नीतिगत तयारी भइरहेको उल्लेख गर्दै उनले यसले शैक्षिक क्षेत्रको अन्तर्राष्ट्रियकरणमा योगदान पुग्ने विश्वास व्यक्त गरे।

नेपाली विद्यार्थीको विदेश पलायनबारे बोल्दै सचिव पौडेलले अध्ययनपछि पर्याप्त रोजगारीका अवसर नपाउँदा धेरै विद्यार्थी विदेशिने गरेको बताए। स्वदेशमै गुणस्तरीय रोजगारी सिर्जना गर्न सकिए युवा जनशक्तिलाई देशभित्रै राख्न सम्भव हुने उनको धारणा थियो।

Read More

काठमाडौं । राष्ट्रिय स्वतन्त्र पार्टी (रास्वपा)को जारी महाधिवेशनमा प्रधानमन्त्री बालेन शाहका नीति, प्रशासन तथा सुशासन सल्लाहकार ई. सुदीप ढकाल तथा स्वकीय उप–सचिव प्रकृति ढकालले खुलातर्फ केन्द्रीय सदस्य पदका लागि उम्मेदवारी दिएका छन्।

चितवनमा जारी महाधिवेशनअन्तर्गत नयाँ नेतृत्व चयनको प्रक्रिया अघि बढिरहेका बेला दुवै जना केन्द्रीय सदस्य पदको प्रतिस्पर्धामा उत्रिएका हुन्। पार्टीको नेतृत्व चयनका लागि बन्दसत्र आजबाट सुरु हुने कार्यतालिका रहेको छ।

यसअघि सोमबार सुरु हुने भनिएको बन्दसत्र प्रतिनिधि चयनसम्बन्धी विवादका कारण निर्धारित समयमा सञ्चालन हुन सकेको थिएन। विवाद समाधानपछि महाधिवेशनका बाँकी कार्यक्रम अगाडि बढाइएको पार्टी स्रोतले जनाएको छ।

रास्वपाले महाधिवेशनमार्फत नयाँ नेतृत्व र केन्द्रीय कार्यसमिति चयन गर्ने तयारी गरिरहेको छ।

Read More

काठमाडौं । नेपाल र स्पेनबीच व्यापार तथा लगानी सम्बन्धलाई नयाँ उचाइमा पुर्‍याउने उद्देश्यसहित म्याड्रिडमा आयोजित ‘नेपाल–स्पेन बिजनेस फोरम २०२६’ मा नेपाली उत्पादनका सम्भावना र व्यावसायिक सहकार्यका अवसरबारे व्यापक छलफल गरिएको छ।

कार्यक्रममा सहभागी नेपाल र स्पेनका उद्योगी तथा व्यवसायीहरूले दुई देशका निजी क्षेत्रबीच प्रत्यक्ष सहकार्य बढाउन सके व्यापार विस्तारका नयाँ अवसर सिर्जना हुने धारणा व्यक्त गरेका छन्। विशेषगरी नेपाली वस्त्र, हस्तकला तथा प्राकृतिक रेसामा आधारित उत्पादनलाई स्पेनी बजारमा प्रवर्द्धन गर्न सकिने विषयमा जोड दिइएको थियो।

स्पेन उद्योग तथा वाणिज्य मण्डलका अन्तरराष्ट्रिय सम्बन्ध उपनिर्देशक लुइस रोड्रिग्वेजले स्पेनका उपभोक्ताहरू मौलिक र विशिष्ट अन्तर्राष्ट्रिय उत्पादनप्रति आकर्षित भइरहेको उल्लेख गर्दै नेपाली उत्पादनका लागि पनि पर्याप्त सम्भावना रहेको बताए। उनले व्यवसाय–व्यवसायबीच प्रत्यक्ष साझेदारी विस्तार गर्न सके द्विपक्षीय व्यापार अझ मजबुत बन्ने विश्वास व्यक्त गरे।

नेपाल निर्यात व्यवसायी महासङ्घका अध्यक्ष गोविन्द घिमिरे तथा उपाध्यक्ष देवनन्द सरावगीले च्याङ्ग्रा र हिमाली भेडाको ऊन, भाङ तथा सिस्नोजस्ता प्राकृतिक स्रोतबाट निर्मित नेपाली वस्त्र र गहनाको अन्तर्राष्ट्रिय बजारमा बढ्दो मागबारे जानकारी गराए। उनीहरूले हस्तनिर्मित चाँदीका गरगहना तथा परम्परागत आभूषणले विशेष बजारमा राम्रो पहिचान बनाइरहेको बताए।

त्यसैगरी, नेपाल व्यापार तथा निकासी प्रवर्द्धन केन्द्रका कार्यकारी निर्देशक नवीनराज शर्माले स्पेनसँगको वस्त्र व्यापारसम्बन्धी तथ्याङ्क प्रस्तुत गर्दै नेपाली तयारी पोसाक र वस्त्रजन्य उत्पादनको निर्यात विस्तारका सम्भावनाबारे प्रकाश पारे। उनले नेपाली उत्पादनको गुणस्तर र मौलिकताले स्पेनी उपभोक्तालाई आकर्षित गर्न सक्ने बताए।

नेपाल गार्मेन्ट सङ्घका अध्यक्ष पशुपति देव पाण्डेले उद्योग क्षेत्रमा भएका नीतिगत सुधारका कारण नेपाली तयारी पोसाक उद्योग थप प्रतिस्पर्धी बन्दै गएको उल्लेख गरे। उनले अन्तर्राष्ट्रिय बजार विस्तारका लागि विदेशी साझेदारसँगको सहकार्य अपरिहार्य रहेको बताए।

फोरमको उद्घाटन गर्दै कार्यवाहक राजदूत पुरक अधिकारीले नेपालमा उपलब्ध लगानीका अवसर, स्वदेशी सीप र प्रविधिमा आधारित उद्योग तथा नैतिक रूपमा प्राप्त कच्चा पदार्थ प्रयोग गर्ने उत्पादनबारे जानकारी गराएका थिए। उनले नेपाल–स्पेन आर्थिक सम्बन्धलाई थप गतिशील बनाउन यस्ता कार्यक्रम उपयोगी हुने धारणा व्यक्त गरे।

म्याड्रिडस्थित नेपाली दूतावासद्वारा आयोजित फोरममा दुवै देशका सरकारी अधिकारी, लगानीकर्ता, उद्योगी, व्यवसायी तथा सञ्चार क्षेत्रका प्रतिनिधिहरूको सहभागिता रहेको थियो। कार्यक्रम प्रश्नोत्तर तथा नेटवर्किङ सत्रसँगै सम्पन्न भएको दूतावासले जनाएको छ।

Read More

काठमाडौं । राष्ट्रिय स्वतन्त्र पार्टी (रास्वपा)को नयाँ नेतृत्व चयनका लागि भोलि (बुधबार) निर्वाचन हुने भएको छ।

केन्द्रीय निर्वाचन आयोगका प्रमुख भुवन केसीका अनुसार आजको बन्दसत्र सम्पन्न भएपछि निर्वाचन प्रक्रिया औपचारिक रूपमा अघि बढाइनेछ। आज दिउँसो २ बजे सुरु हुने बन्दसत्र साँझ ६ः४५ बजे समापन हुने कार्यक्रम तय गरिएको छ।

निर्वाचनमा विद्युतीय मतदान प्रणाली प्रयोग गरिनेछ। महाधिवेशनमा प्रत्यक्ष रूपमा सहभागी हुन नसकेका विदेशस्थित प्रतिनिधिहरूका लागि रास्वपाको आफ्नै मोबाइल एपमार्फत मतदान गर्ने व्यवस्था गरिएको निर्वाचन आयोगले जनाएको छ।

निर्वाचनका लागि ८० वटा विद्युतीय मतदान उपकरण तयारी अवस्थामा राखिएको छ। मतदानबाट एक सभापति तथा ९९ जना केन्द्रीय सदस्य चयन गरिने प्रमुख केसीले जानकारी दिए।

निर्वाचन आचारसंहिताअनुसार कुनै पनि उम्मेदवारका प्रस्तावक वा समर्थक स्वयं उम्मेदवार बन्न नपाउने व्यवस्था गरिएको छ।

Read More

काठमाडौं । सङ्खुवासभाको मादी नगरपालिका–३ थामेखर्कमा गए राति लाक्पा शेर्पाको तीन तले घरमा आगलागी हुँदा करिब रु १५ लाख बराबरको क्षति भएको छ।

जिल्ला प्रहरी कार्यालय, सङ्खुवासभाका निमित्त प्रमुख प्रहरी निरीक्षक धनबहादुर राजवंशीका अनुसार आगलागीबाट घरभित्र राखिएको नगद रु ५० हजार, दुई तोला सुन, ३० मुरी आलु, तीन मुरी धान, चार मुरी मकैसहित विभिन्न अन्नपात, भाँडाकुँडा तथा लत्ताकपडा जलेर नष्ट भएका छन्।

घरधनी शेर्पा सुतिरहेको अवस्थामा आगलागी भएको जनाइएको छ। आगलागीको कारण भने हालसम्म खुल्न नसकेको प्रहरीले जनाएको छ।

घटनाको जानकारी प्राप्त हुनासाथ प्रहरी चौकी मङ्गलबारेबाट प्रहरी सहायक निरीक्षक सुदेश चौधरीको नेतृत्वमा प्रहरी टोली घटनास्थलतर्फ परिचालन गरिएको थियो। घटनाबारे थप अनुसन्धान भइरहेको जिल्ला प्रहरीले जनाएको छ।

Read More

काठमाडौं । पूर्वी सीमा नाका काँकरभिट्टामा यात्रु तथा मालवस्तुको चेकजाँचलाई व्यवस्थित र प्रभावकारी बनाउन ‘एकीकृत जाँच एकाइ’ पुनः सञ्चालनमा आएको छ ।

सोमबारदेखि सञ्चालनमा आएको उक्त एकाइमा मेची भन्सार कार्यालय, इलाका प्रहरी कार्यालय काँकरभिट्टा तथा सशस्त्र प्रहरी बल नेपालको सीमा सुरक्षा गुल्मका सुरक्षाकर्मीले एउटै स्थानबाट संयुक्त रूपमा यात्रुका सामानको परीक्षण गर्ने व्यवस्था पुनः सुरु गरेका हुन् ।

योसँगै सीमा सुरक्षा, भन्सार निगरानी तथा यात्रु सेवामा समन्वयात्मक सुधार हुने अपेक्षा गरिएको छ । जेनजी आन्दोलनका क्रममा क्षति पुगेपछि बन्द भएको यो एकाइ झण्डै १० महिनापछि पुनः सञ्चालनमा आएको हो ।

मेचीनगर नगरपालिका–६ स्थित काँकरभिट्टा नाका भारतको पश्चिम बङ्गाल राज्यअन्तर्गत दार्जिलिङ जिल्लाको पानीट्याङ्कीसँग जोडिएको नेपालको व्यस्त अन्तरराष्ट्रिय प्रवेशद्वार हो । यस नाकाबाट दैनिक हजारौँ यात्रु आवतजावत हुने तथा ठूलो परिमाणमा मालवस्तु ओसारपसार हुने भएकाले प्रभावकारी जाँच प्रणालीको आवश्यकता लामो समयदेखि महसुस हुँदै आएको थियो ।

यसअघि मेची भन्सार कार्यालय परिसरमा अत्याधुनिक ‘एक्स–रे’ मेसिनसहित एकद्वार भन्सार जाँच प्रणाली सञ्चालनमा थियो । भन्सार, नेपाल प्रहरी र सशस्त्र प्रहरीले एउटै स्थानबाट संयुक्त रूपमा निगरानी गर्दा चोरी–तस्करी नियन्त्रणमा सहयोग पुग्नुका साथै यात्रुहरूले सहज सेवा पाउँदै आएका थिए ।

गत भदौ २३ र २४ गते भएको प्रदर्शनका क्रममा संरचनामा आगजनी भएपछि जाँच प्रणाली प्रभावित भएको थियो । भवन तथा उपकरणमा क्षति पुगेपछि सम्बन्धित निकायले छुट्टाछुट्टै स्थानबाट चेकजाँच गर्दै आएका थिए, जसले यात्रुलाई पटक–पटक सामान देखाउनुपर्ने अवस्था सिर्जना गर्नुका साथै समन्वयमा चुनौती उत्पन्न गरेको थियो ।

उक्त एकाइ सञ्चालनमा आएको अवसरमा मेची भन्सार कार्यालयका प्रमुख भन्सार अधिकृत शिवलाल न्यौपाने, इलाका प्रहरी कार्यालय काँकरभिट्टाका प्रहरी नायब उपरीक्षक निशेष चापागाईं तथा सशस्त्र प्रहरी बल नेपाल सीमा सुरक्षा गुल्म काँकरभिट्टाका गणपति सशस्त्र प्रहरी उपरीक्षक विकास थापाले संयुक्त रूपमा उद्घाटन गरेका हुन् ।

हाल जाँचस्थलमा ‘एक्स–रे’ मेसिन भने जडान गरिएको छैन । सम्बन्धित निकायले आवश्यक प्रक्रिया पूरा गरी छिट्टै पुनः मेसिन सञ्चालनमा ल्याउने जानकारी दिएका छन् ।

सीमानाकामा एकीकृत जाँच प्रणाली पुनः सुरु भएपछि भन्सार छली, मूल्याङ्कन तथा अवैध ओसारपसार नियन्त्रणमा थप प्रभावकारिता आउने अपेक्षा गरिएको छ । एउटै स्थानमा प्रक्रिया पूरा गर्न सकिने भएपछि समयको बचत हुनुका साथै प्रशासनिक झन्झटसमेत घट्ने मेची भन्सार प्रमुख न्यौपानेको भनाइ छ ।

Read More