काठमाडौं । रुपन्देहीको सिद्धार्थनगर स्थित एक क्यासिनोमा जुवा खेलिरहेको अवस्थामा १९ नेपाली नागरिक पक्राउ परेका छन्।
लुम्बिनी प्रदेश प्रहरी कार्यालय र जिल्ला प्रहरी कार्यालय रुपन्देही को संयुक्त टोलीले सिद्धार्थनगर नगरपालिका–१० मा रहेको होटल गौतमबुद्ध इन्टरनेसनल भित्र सञ्चालित रोयल कालिङ्गा क्यासिनो मा गएराति छापा मारेर उनीहरूलाई नियन्त्रणमा लिएको हो।
जिल्ला प्रहरी कार्यालयका सूचना अधिकारी कृष्णकुमार चन्द का अनुसार पक्राउ पर्नेमा क्यासिनो व्यवस्थापनमा संलग्न चार जना र जुवा खेलिरहेका १५ जना रहेका छन्। उनीहरूलाई विशेष सूचनाका आधारमा सञ्चालन गरिएको अपरेसनमार्फत नियन्त्रणमा लिइएको जनाइएको छ।
प्रहरीका अनुसार पक्राउ परेकाहरू विभिन्न जिल्ला तथा रुपन्देही क्षेत्रका बासिन्दा हुन्। घटनास्थलबाट ९५ हजार ५०० रुपैयाँ नगद, १७ थान मोबाइल फोन र ५० थान क्यासिनो क्वाइन बरामद गरिएको छ।
पक्राउ परेकामाथि जुवासम्बन्धी कसुरमा थप अनुसन्धान भइरहेको प्रहरीले जनाएको छ।
