काठमाडौँ । अलैँची खेतीको प्रवर्द्धन तथा मूल्य शृङ्खला सुदृढीकरण गर्ने उद्देश्यसहित आठराई त्रिवेणी गाउँपालिका, ताप्लेजुङ, नेपाल मा आगामी असार १२ र १३ गते प्रदेशस्तरीय अलैँची महोत्सव आयोजना गरिने भएको छ।
महोत्सव मूल समारोह समितिका संयोजक बालचन्द्र आङ्बुहाङका अनुसार ताप्लेजुङमा पहिलोपटक यस स्तरको अलैँची महोत्सव आयोजना हुन लागेको हो। यस कार्यक्रमले स्थानीय स्तरमा उत्पादन हुने अलैँचीको पहिचान, गुणस्तर सुधार तथा बजार विस्तारमा महत्वपूर्ण योगदान पुर्याउने अपेक्षा गरिएको छ।
कृषि ज्ञान केन्द्र, ताप्लेजुङ र गाउँपालिकाको आर्थिक सहयोगमा आयोजना हुने उक्त महोत्सवमा अलैँचीका बिरुवा तथा उत्पादनहरूको प्रदर्शनी, अलैँचीबाट निर्मित खाद्य सामग्रीहरूको प्रदर्शन तथा उत्कृष्ट र कमजोर बगानहरूको अवलोकन तथा तुलनात्मक अध्ययनका गतिविधिहरू समावेश गरिने आयोजकले जनाएको छ।
त्यसैगरी महोत्सवअन्तर्गत अलैँची किसानहरूका लागि कार्यशाला, व्यवसायी, खरिदकर्ता र बिक्रेताबीच अन्तरक्रिया तथा आधुनिक खेती प्रणाली र बजार विस्तारका विषयमा विज्ञ टोलीसँग छलफल कार्यक्रमसमेत सञ्चालन गरिनेछ।
ताप्लेजुङलाई अलैँचीको प्रमुख नगदेबाली उत्पादन क्षेत्रका रूपमा चिनिन्छ। जिल्लामा करिब ३ हजार ७ सय हेक्टर क्षेत्रफलमा अलैँची खेती हुँदै आएको तथ्याङ्कले देखाउँछ।
