काठमाडौं । पोखरामा प्रस्तावित सुविधासम्पन्न बसपार्क निर्माणको तयारीस्वरूप पोखरा महानगरपालिकाले पृथ्वीचोकस्थित बसपार्क क्षेत्रभित्रका व्यापारिक संरचनाहरू हटाएको छ। दशकौँदेखि अतिक्रमित क्षेत्रमा निर्माण प्रक्रिया अघि बढाउन ‘साइट क्लियर’ गर्ने काम थालिएको हो।
महानगरले बास्तोला कम्प्लेक्ससहित उत्तरतर्फका पेट्रोलपम्प लाइनका सटर तथा कबलहरू हटाएको छ। २०३० सालमा बसपार्कका लागि अधिग्रहण गरिएको जग्गा लामो समयपछि खाली गरिएसँगै सरसफाइ तथा सम्याउने काम पनि गरिएको छ।
यद्यपि बसपार्क क्षेत्रभित्र रहेका तीन सुकुमवासी बस्ती भने अझै हटाइएको छैन। करिब ५७२ परिवार बसोबास गर्दै आएको उक्त क्षेत्रमा व्यवस्थापनको विकल्प सुनिश्चित भएपछि मात्र हटाइने महानगरले जनाएको छ।
महानगर प्रमुख धनराज आचार्यका अनुसार सुकुमवासी बस्तीका परिवारहरूको विवरण तथा कागजात छानबिन भइरहेको छ। झुटो विवरण दिइएको पाइए कानुनी कारबाही हुने चेतावनीसमेत उनले दिएका छन्। उनका अनुसार व्यवस्थापन प्रक्रिया पूरा भएपछि मात्र स्थानान्तरण अघि बढाइनेछ।
सुकुमवासी बस्ती व्यवस्थापन नगरी जबरजस्ती हटाइने छैन भन्ने प्रतिबद्धता दोहोरिँदै आएको भए पनि केही असम्बन्धित व्यक्तिहरूले गलत सूचना फैलाएको दाबी महानगरले गरेको छ।
यसैबीच, बसपार्कका लागि अधिग्रहण गरिएको जग्गा र त्यसमा भएको सट्टाभर्ना तथा वितरणसम्बन्धी विवादबारे छानबिन गर्न पूर्वन्यायाधीशको नेतृत्वमा न्यायिक समिति गठन गरिएको छ। समितिको प्रतिवेदन भने अझै सार्वजनिक हुन बाँकी छ।
स्थानीय सुकुमवासी प्रतिनिधिहरूले भने वैकल्पिक व्यवस्था सुनिश्चित भए आफूहरू स्थान छाड्न तयार रहेको बताएका छन्।
