काठमाडौं । कतारको रस लाफान औद्योगिक क्षेत्रभित्र रहेको ग्यास उत्पादन केन्द्रमा भएको विस्फोटमा नेपाली श्रमिकहरू पनि घाइते भएका छन्। आइतबार भएको घटनामा १३ जनाको मृत्यु भएको पुष्टि भएको छ भने ६६ जनाभन्दा बढी घाइते भएका छन्।
मृतकमध्ये १२ जना भारतीय र एक जना पाकिस्तानी नागरिक रहेको जनाइएको छ। घाइते हुनेमा नेपालीसहित कतार, भारत, पाकिस्तान, बंगलादेश, केन्या, घाना, तान्जानिया र नाइजेरियाका नागरिकहरू रहेका छन्।
घाइतेहरूको पहिचान सार्वजनिक गरिएको छैन भने उनीहरूको स्थानीय अस्पतालमा उपचार जारी रहेको बताइएको छ। घटनाको कारणबारे विस्तृत विवरण सार्वजनिक भइसकेको छैन।
दोहास्थित भारतीय दूतावासले सामाजिक सञ्जाल ‘एक्स’ मार्फत १२ भारतीय नागरिकको मृत्यु भएको पुष्टि गर्दै घटनाप्रति गहिरो दुःख व्यक्त गरेको छ।
