काठमाडौँ । पूर्वअर्थमन्त्री तथा एमाले उपाध्यक्ष विष्णुप्रसाद पौडेलसम्बन्धी बन्दीप्रत्यक्षीकरण रिटको सुनुवाइका लागि सर्वोच्च अदालतमा पेसी तोकिएको छ।
सर्वोच्च अदालतका न्यायाधीशद्वय विनोद शर्मा र नित्यानन्द पाण्डेको संयुक्त इजलासमा उक्त निवेदनमाथि सुनुवाइ हुने तय भएको हो।
पौडेलकी श्रीमती दोमाया पौडेलले उनलाई गैरकानुनी रूपमा थुनामा राखिएको दाबी गर्दै असार १० गते सर्वोच्च अदालतमा बन्दीप्रत्यक्षीकरण निवेदन दायर गरेकी थिइन्।
यसअघि न्यायाधीश टेकप्रसाद ढुङ्गाना र मेघराज पोखरेलको संयुक्त इजलासले विशेष अदालतमा विचाराधीन सम्पत्ति शुद्धीकरण सम्बन्धी मुद्दाको फाइल झिकाउन आदेश दिएको थियो। उक्त मुद्दामा नेपाल सरकार वादी र दीपक भट्टसहित अन्य प्रतिवादी रहेका छन्।
पौडेललाई सम्पत्ति शुद्धीकरणसम्बन्धी आरोपमा असार ८ गते सुर्खेतबाट पक्राउ गरी असार ९ गते विशेष अदालत, काठमाडौँमा उपस्थित गराइएको थियो। विशेष अदालतले उनलाई थप तीन दिन न्यायिक हिरासतमा राखी अनुसन्धान गर्न अनुमति दिएको थियो।
