काठमाडौं । बर्डफ्लुबाट प्रभावित ११ जिल्लाका किसानलाई क्षतिपूर्ति रकम वितरणको प्रक्रिया अन्तिम चरणमा पुगेको छ। पशुसेवा विभागले रोग नियन्त्रणका क्रममा नष्ट गरिएका पन्छी, अण्डा र दानाको ७५ प्रतिशत राहतस्वरूप करिब ५२ करोड रुपैयाँ एक साताभित्र किसानको बैंक खातामा जम्मा गर्ने जनाएको छ।
काठमाडौं, ललितपुर, भक्तपुर, काभ्रे, झापा, मोरङ, सुनसरी, महोत्तरी, बारा, चितवन र नवलपरासीमा बर्डफ्लुको बढी प्रभाव देखिएको छ। हालसम्म करिब ७ लाख पन्छी, ११ लाख अण्डा र ३ लाख किलो दाना नष्ट गरिएको छ भने कुल आर्थिक क्षति करिब ७० करोड रुपैयाँ पुगेको विभागको अनुमान छ।
यता, प्रतिकूल मौसमका कारण यस वर्ष देशभर धान रोपाइँ पनि सुस्त बनेको छ। कृषि विभागका अनुसार सोमबारसम्म ३२.३८ प्रतिशत मात्र रोपाइँ भएको छ, जुन गत वर्षको यही अवधिको तुलनामा १२.६२ प्रतिशतले कम हो।
प्रदेशगत रूपमा सुदूरपश्चिम (५७.९%) मा सबैभन्दा बढी र मधेस (१५.६%) मा सबैभन्दा कम रोपाइँ भएको छ। कृषि विभागले मनसुन ढिलो सक्रिय हुँदा रोपाइँ प्रभावित भएको जनाएको छ भने पछिल्ला दिनमा वर्षा बढेकाले रोपाइँले गति लिने अपेक्षा गरिएको छ। विशेषगरी देशको धान उत्पादनमा ठूलो योगदान दिने मधेस प्रदेशमा कम रोपाइँ भएकाले यस वर्ष उत्पादनमा असर पर्ने आकलन गरिएको छ।
