काठमाडौँ । उद्योग, वाणिज्य तथा आपूर्तिमन्त्री गौरी कुमारीले लामो समयदेखि बन्द रहेको हेटौँडा कपडा उद्योग केही महिनाभित्र पुनः सञ्चालनमा आउने बताएकी छन्।
मंगलबार राष्ट्रिय सभाको बैठकमा आफ्नो मन्त्रालयअन्तर्गतको विनियोजन शीर्षकमाथि सांसदहरूले उठाएका प्रश्नको जवाफ दिँदै मन्त्री कुमारीले उद्योग पुनः सञ्चालनका लागि आवश्यक मर्मत तथा पूर्वतयारीको काम तीव्र गतिमा अघि बढिरहेको जानकारी दिइन्।
उनका अनुसार उद्योगको मर्मतसम्भारका लागि अर्थ मन्त्रालयबाट ३३ लाख रुपैयाँ बजेट निकासा भइसकेको छ र उक्त रकम उद्योगमा पुगिसकेको छ। त्यसकै आधारमा आवश्यक मर्मत कार्य सुरु भइसकेको उनले बताइन्।
‘हेटौँडा कपडा उद्योगका लागि ३३ लाख रुपैयाँ बजेट निकासाका लागि अर्थ मन्त्रालयमा लेखी पठाएको थिएँ। बजेट निकासा भइसकेको छ, उद्योगमा पुगिसकेको छ र मर्मत कार्य पनि अघि बढिरहेको छ। केही महिनाभित्र उद्योग सञ्चालनमा आउनेछ भन्ने विश्वास दिलाउन चाहन्छु,’ मन्त्री कुमारीले संसदमा भनिन्।
सरकारले निष्क्रिय अवस्थामा रहेका सार्वजनिक उद्योगहरूलाई पुनः सञ्चालनमा ल्याउने नीति अनुरूप हेटौँडा कपडा उद्योगलाई प्राथमिकतामा राखेको छ। उद्योग सञ्चालनमा आएपछि स्वदेशमै कपडा उत्पादन बढ्नुका साथै स्थानीय स्तरमा रोजगारी सिर्जना हुने र आयातमा केही हदसम्म निर्भरता घट्ने अपेक्षा गरिएको छ।
हेटौँडा कपडा उद्योग नेपालका पुराना सरकारी औद्योगिक प्रतिष्ठानमध्ये एक हो। विभिन्न आर्थिक तथा व्यवस्थापकीय समस्याका कारण लामो समयदेखि उद्योग बन्द अवस्थामा रहेको थियो। पछिल्ला वर्षहरूमा उद्योग पुनः सञ्चालन गर्ने विषय पटक–पटक उठ्दै आए पनि कार्यान्वयन हुन सकेको थिएन। सरकारले पछिल्लो बजेटमार्फत उद्योगको पुनः सञ्चालनलाई प्राथमिकता दिएको जनाएको छ।
