काठमाडौं । नेपालको आँखा उपचार सेवा र प्राविधिक क्षमताको कम्बोडियाले प्रशंसा गरेको छ। कम्बोडियाको विदेश तथा अन्तर्राष्ट्रिय सहयोग मन्त्रालयका स्थायी सचिव तथा प्रधानमन्त्रीका निजी सल्लाहकार इट सोफियाले नेपालले सञ्चालन गरेको निःशुल्क आँखा उपचार शिविरको सफलताको प्रशंसा गरेका हुन्।
थाइल्यान्डका लागि नेपाली राजदूत धनबहादुर ओलीसँग भएको भेटमा सोफियाले कम्बोडियाको कम्पोङ चाम प्रान्तमा सम्पन्न आँखा शिविरबाट स्थानीय नागरिक लाभान्वित भएको भन्दै नेपालको सहयोगप्रति धन्यवाद व्यक्त गरे।
नेपाल नेत्रज्योति सङ्घ, लुम्बिनी नेत्रविज्ञान अध्ययन संस्थान तथा रिसर्च सेन्टर र थाइल्यान्डस्थित नेपाली राजदूतावासको समन्वयमा असार २० र २१ गते सञ्चालन गरिएको शिविरमा एक हजार दुई जना कम्बोडियाली नागरिकले निःशुल्क आँखा परीक्षण तथा उपचार सेवा लिएका थिए।
शिविरमा ३७३ जनालाई औषधि, ४०७ जनालाई चश्मा र १९२ जनालाई औषधिसहित चश्मा वितरण गरिएको थियो। परीक्षणका क्रममा ९३ जनामा मोतियाबिन्दुको समस्या देखिएपछि थप उपचारका लागि स्थानीय अस्पतालमा पठाइएको थियो।
भेटका क्रममा नेपाल र कम्बोडियाबीच आँखा उपचारसहित जनस्वास्थ्य, शिक्षा, कृषि, पर्यटन तथा आर्थिक सहकार्य विस्तार गर्ने विषयमा पनि छलफल भएको थियो। राजदूत ओलीले कम्बोडियाको आँखा स्वास्थ्य क्षेत्रको क्षमता विकासका लागि तालिम तथा प्राविधिक सहयोग उपलब्ध गराउन नेपाल तयार रहेको बताए।
दुई देशबीच बौद्ध तथा सांस्कृतिक पर्यटन प्रवर्द्धनका लागि नेपालको लुम्बिनी र कम्बोडियाको अङ्कोर वाटबीचको सम्बन्धलाई थप मजबुत बनाउने विषयमा समेत जोड दिइएको थियो।
